ԻՐԱՆԻ ՀԱԿԱՀԵՏԱԽՈՒԶՈՒԹՅՈՒՆԸ ԱԴՐԲԵՋԱՆՑԻՆԵՐԻ ԵԼՈՒՅԹՆԵՐԻ ՀԱՄԱՐ
ԿԱՍԿԱԾՈՒՄ Է ՎԱՇԻՆԳՏՈՆԻՆ ԵՎ ԹԵԼ-ԱՎԻՎԻՆ
29-05-2006 17:27:00 | Իրան | Միջազգային
ԹԵՀՐԱՆ, 29 ՄԱՅԻՍԻ, ՆՈՅՅԱՆ ՏԱՊԱՆ: Իրանական
հակահետախուզությունը ԱՄՆ-ի եւ Իսրայելի հատուկ ծառայություններին
կասկածում է Իրանի էթնիկ ադրբեջանցիների անկարգություններին
մեղսակցության մեջ: Այս մասին հաղորդում է «Եվրասիայի հատուկ
ծառայությունների նորությունները»` վկայակոչելով AIA-ի թուրքական
սեկցիայի աղբյուրները` նշելով, որ Իրանի իշխանությունների եւ տեղի
ադրբեջանցիների միջեւ դիմակայությունը սկսվել է մայիսի 12-ին երկրի
գլխավոր «Իրան» կառավարական թերթում ադրբեջանական թյուրքերի համար
վիրավորական ծաղրանկարի եւ տեքստի հրապարակմամբ: Ծաղրանկարում
պատկերված է մի տղա, որը մի քանի անգամ պարսկերեն կրկնում է
«խավարասեր» բառը, մինչեւ նրա դիմաց գտնվող խավարասերը չի հարցնում
նրան ադրբեջաներեն` «ի՞նչ»:
Ըստ իրանական հետախուզության բարձրաստիճան սպաների,
խժդժությունների ետեւում կանգնած են արտասահմանյան հատուկ
ծառայություններ` առաջին հերթին ամերիկյան եւ իսրայելական: Նրանց
կարծիքով, ամերիկացիները պառակտիչ գործողությունների իրականացման
համար օգտվում են հարեւան Ադրբեջանի հանրապետության տարածքից:
Իրանցիների մտավախությունն է հարուցում այն, որ թշնամական
հետախուզությունների գործողություններին կարող են միանալ եւ
թուրքական հատուկ ծառայությունները: Ինչպես նշվում է, իրանցիները
կասկածում են, որ ցույցերի նախաձեռնողներից մեկը Հարավային
Ադրբեջանի ազգային վերազարթոնքի շարժման ղեկավար Մահմուդալի
Չեհրագանլին է, որն ապրում է Վաշինգտոնում: Նա վերջերս հայտարարել
է, որ պատրաստվում է այցելել Բաքու եւ Անկարա: Թավրիզում
անկարգությունների ընթացքում ցուցարարները վանկարկել են նրա
անունը: Իրանի նախագահ Մահմուդ Ահմադինեջադը նույնպես հայտարարել
է, որ ցույցերի ետեւում կանգնած են արտասահմանյան պետություններ:
«Այսօր Իրանը, շնորհիվ իր երիտասարդ գիտնականների, լրիվ տիրապետում
է միջուկային վառելիքային ցիկլին: Եվ Իսլամական Հանրապետության
թշնամիները դավադրություններ են ծրագրում ու ձգտում են պառակտում
մտցնել իրանցիների միջեւ, որպեսզի խանգարեն մեր ժողովրդին
իրացնելու իրենց իրավունքը (միջուկային ոլորտում)»,- իրանական
հեռուստատեսության ուղիղ եթերում ասել է Ահմադինեջադը: «Եթե նրանք
(թշնամիները) թեկուզ փոքրագույն վնաս հասցնեն իրանական ժողովրդին
կամ նվազագույն ագրեսիայի դիմեն, ապա «պատմական ապտակ» կստանան»,-
նախազգուշացրել է Իրանի նախագահը: «Նրանք (ԱՄՆ-ը եւ դաշնակիցները)
պետք է իմանան, որ ոչ ոք չի կարող հակամարտություն հրահրել
համախմբված իրանական ժողովրդի ներսում»,- հայտարարել է
Ահմադինեջադը: