ՌԵՎԱԶ ԳԱՉԵՉԻԼԱՁԵ. ՎՐԱՍՏԱՆԻ ԿԱՌԱՎԱՐՈՒԹՅՈՒՆԸ ՊԵՏՔ Է ԱՄԵՆ ԻՆՉ
ԱՆԻ, ՈՐՊԵՍԶԻ ՋԱՎԱԽՔՈՒՄ ԱՊՐՈՂ ՀԱՅՈՒԹՅՈՒՆԸ ԻՐԵՆ ԼԱՎ ԶԳԱ
31-01-2006 18:10:00 | Հայաստան | Մշակույթ
ԵՐԵՎԱՆ, 31 ՀՈՒՆՎԱՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
«Ջավախք-Ախալցխա» խորագիրն է կրում հունվարի 31-ին Հայաստանի
Ազգային գրադարանում բացված ցուցահանդեսը, որտեղ առանձին
ցուցափեղկերով ներկայացված են ջավախահայ գրողների գրքեր, ինչպես
նաեւ Հայաստանում լույս տեսնող պարբերականներ, որոնց էջերում
ներկայացվում են Ջավախքին եւ ջավախահայությանը վերաբերող խնդիրներ:
«Վահան Տերյան» մշակութային կենտրոնի տնօրեն Առուշան
Հակոբյանի խոսքերով, ցուցահանդեսի միջոցով մեկ անգամ եւս փորձ է
արվել ներկայացնել այն հսկայական մշակույթը, որ ստեղծել են
ջավախքցիները: «Դարեր շարունակ ահավոր ծանր պայմաններում ապրած
Ջավախք-Ախալցխա, Սամցխե-Ջավախեթի տարածաշրջանի ժողովուրդն անմասն
չի մնացել այն մեծ մշակույթից, որ հայ ժողովուրդը ստեղծել եւ
ստեղծում է այսօր»,- նշեց նա:
Հայաստանի Գրողների միության նախագահ Լեւոն Անանյանը նշեց, որ
արդեն երկար տարիներ հայ եւ վրաց գրողները չեն համագործակցում, եւ
այդ բացը լրացնելու նպատակով մայիսին կանցկացվեն վրացական պոեզիայի
օրեր Երեւանում, իսկ հոկտեմբերին` հայ պոեզիայի օրեր Թբիլիսիում:
Նա գտնում է, որ մշակութային միջոցառումների միջոցով կվերականգնվի
հայ եւ վրաց ժողովուրդների դարավոր հարեւանությունը:
Ըստ Հայաստանում Վրաստանի դեսպան Ռեւազ Գաչեչիլաձեի,
մշակութային միջոցառումները հայ եւ վրաց ժողովուրդներին հարկավոր
են, քանի որ դրանց միջոցով են երկու երկրները բարեկամանում եւ
միանում: Դեսպանի խոսքերով, Վրաստանի կառավարությունը պետք է ամեն
ինչ անի, որպեսզի Ջավախքում ապրող հայությունն իրեն լավ զգա, քանի
որ նաեւ դրանով են պայմանավորված երկու ժողովուրդների հետագա
հարաբերությունները: