2005-ԻՆ ՀԱՅԱՍՏԱՆԻ 16 ՊԵՏԱԿԱՆ ԹԱՏՐՈՆՆԵՐՈՒՄ ՑՈՒՑԱԴՐՎԵԼ Է 1415
ՆԵՐԿԱՅԱՑՈՒՄ
23-01-2006 17:00:00 | Հայաստան | Մշակույթ
ԵՐԵՎԱՆ, 23 ՀՈՒՆՎԱՐԻ, ՆՈՅՅԱՆ ՏԱՊԱՆ: Հայաստանի 16 պետական
թատրոններում 2005 թ. ընթացքում ցուցադրվել է 1415 ներկայացում:
Տարվա ընթացքում պետական աջակցությամբ անցկացվել են «Արմմոնո-3»
միջազգային, «Տավուշ-2005», մանկապատանեկան տիկնիկային առաջին եւ
ասմունքի փառատոնները:
ՀՀ մշակույթի եւ երիտասարդության հարցերի նախարարության
տվյալներով, անցյալ տարի երկրի թատերական կոլեկտիվները մասնակցել
են մի շարք փառատոնների, այդ թվում Գաբրիել Սունդուկյանի անվան
Ազգային ակադեմիական թատրոնը մասնակցել է Մոսկվայի Չեխովյան 6-րդ
միջազգային թատերական փառատոնին: 2005 թ. Վանաձորի Հովհաննես
Աբելյանի անվան Պետական դրամատիկական թատրոնը հյուրախաղերով հանդես
է եկել Թբիլիսիում, իսկ Գյումրու Վարդան Աճեմյանի անվան Պետական
դրամատիկական թատրոնը` Սիրիայում:
Ժողարվեստի ոլորտում պետական աջակցությամբ իրականացվել են
«Գիտելիք եւ խորհրդանիշ, հավատալիք եւ սովորույթ» միջազգային
գիտաժողովը, «Պահպանենք մեր մշակույթը» արվեստի եւ «Եղեգան փող»
աշուղական-գուսանական երգի փառատոնները: