ԵՐԵՎԱՆ, 4 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: ՀՀ 2005 թ. պետական բյուջեով 1 մլն դոլար է հատկացվել 5 պատմամշակութային հուշարձանների եւ եկեղեցիների վերականգնման եւ բարեկարգման համար: Ներկայումս սկսվել է Ամբերդի վանական համալիրի վերականգնումը, որից հետո մինչեւ 2008 թ. կկատարվի նաեւ դղյակի եւ բաղնիքի մասնակի վերականգնումը: Ինչպես «ՆՈՅՅԱՆ ՏԱՊԱՆ»-ի թղթակցին հայտնեց ՀՀ մշակույթի եւ երիտասարդության հարցերի փոխնախարար Գագիկ Գյուրջյանը, միայն 2005թ. Ամբերդի վերականգնման աշխատանքների համար հատկացվել է 100 հազար դոլար: Ըստ նրա, յուրաքանչյուր տարի` մինչեւ 2008 թ., պատմամշակութային այս համալիրի վերականգնման համար պետական միջոցներից կհատկացվեն գումարներ: Սկսվել են նաեւ Վայոց ձորի Սպիտակավոր եկեղեցու, Ստեփանավանի Վահանավանքի, Դաշտադեմի ամրոցի եւ Կուրթանի Հնեվանքի վերականգնման աշխատանքները:

---