ՖՈՒՏԲՈԼԻ ՀԱՅԱՍՏԱՆԻ ՄԻՆՉԵՎ 17 ՏԱՐԵԿԱՆՆԵՐԻ ՀԱՎԱՔԱԿԱՆԸ
ԵՎՐՈՊԱՅԻ ԱՌԱՋՆՈՒԹՅԱՆ ԽՄԲԱՅԻՆ ՄՐՑԱՇԱՐԸ ԿԱՆՑԿԱՑՆԻ ՍԵՓԱԿԱՆ ՀԱՐԿԻ
ՏԱԿ
02-12-2005 18:00:00 | Հայաստան | Սպորտ
ԵՐԵՎԱՆ, 2 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Դեկտեմբերի 2-ի ուշ
երեկոյան Կիպրոսի Լիմասոլ քաղաքում տեղի է ունեցել 2006/2007
թվականների մինչեւ 17 եւ մինչեւ 19 տարեկանների Եվրոպայի
առաջնությունների նախնական փուլերի մրցավայրերի ընտրության
քննարկումը: Որոշում է ընդունվել մինչեւ 17 տարեկանների 10-րդ խմբի
մրցաշարը անցկացնել Հայաստանում: Այս խմբում ընդգրկված են
Հայաստանի, Շոտլանդիայի, Հունգարիայի եւ Բուլղարիայի
հավաքականները:
Ինչպես «ՆՈՅՅԱՆ ՏԱՊԱՆ»-ին հայտնեցին Հայաստանի ֆուտբոլի
ֆեդերացիայի Մամուլի քարտուղարությունից, ՀՖՖ-ի պատվիրակությանը
հաջողվել է ՈՒԵՖԱ-ի 8-րդ երիտասարդական պատվիրակության կոնֆերանսի
ներկայացուցիչներին համոզիչ փաստարկներով ապացուցել ՀՖՖ-ի եւ
Հայաստանի ֆուտբոլային ենթակառուցվածքների պատրաստվածությունը`
հանդես գալու որպես մրցաշարի կազմակերպիչ:
Մրցաշարը տեղի կունենա սեպտեմբերի 30-ից հոկտեմբերի 5-ն ընկած
ժամանակահատվածում: Առաջին հանդիպումը Հայաստանի հավաքականը
կանցկացնի սեպտեմբերի 30-ին, երկրորդը` հոկտեմբերի 2-ին, երրորդը`
հոկտեմբերի 5-ին:
Մինչեւ 19 տարեկանների Հայաստանի հավաքականը, որը 7-րդ խմբում
ընդգրկված է Հունգարիայի, Կիպրոսի եւ Ադրբեջանի հավաքականների հետ,
խմբային մրցաշարը կանցկացնի Կիպրոսում` հոկտեմբերի 27-ից նոյեմբերի
1-ն ընկած ժամանակահատվածում: Առաջին հանդիպումը Հայաստանի
հավաքականը կանցկացնի հոկտեմբերի 27-ին, երկրորդը` հոկտեմբերի
29-ին, երրորդը` նոյեմբերի 1-ին: