Հայաստանի օմբուդսմենը միջնորդել է Հակոբ Հակոբյանին
տեղափոխել «Դատապարտյալների հիվանդանոց»
22-01-2009 14:42:00 | Հայաստան | Իրավունք
ԵՐԵՎԱՆ, 22 ՀՈՒՆՎԱՐԻ, ՆՈՅՅԱՆ ՏԱՊԱՆ: Հայաստանի
Արդարադատության նախարարության «Երեւան-Կենտրոն» քրեակատարողական
հիմնարկում կալանք կրող Հակոբ Հակոբյանը, ով «Յոթի գործ»-ով
ամբաստանյալներից մեկն է, ՀՀ Մարդու իրավունքների պաշտպանի
աշխատակազմի աշխատակիցներին հայտնել է, որ իր մոտ առկա է
արտահայտված դիզբակտերիոզ, ցավեր երիկամների եւ աղիների հատվածում:
Ինչպես «ՆՈՅՅԱՆ ՏԱՊԱՆ»-ին հայտնեցին ՀՀ Մարդու իրավունքների
պաշտպանի աշխատակազմի Տեղեկատվության եւ հասարակայնության հետ
կապերի բաժնից, այդ առնչությամբ պաշտպան Արմեն Հարությունյանը
դիմել է արդարադատության նախարար Գեւորգ Դանիելյանին` խնդրելով
քննարկել Հ.Հակոբյանին «Դատապարտյալների հիվանդանոց» ՔԿՀ
տեղափոխելու նպատակահարմարության հարցը: