ԹԵԼ ԱՎԻՎ, 9 ՀՈՒՆՎԱՐԻ, ՆՈՅՅԱՆ ՏԱՊԱՆ: ԱՄՆ-ի նախագահ Ջորջ
Բուշը ժամանել է Իսրայել, որտեղից սկսում է իր մերձավորարեւելյան
ուղեւորությունը, հաղորդում է ԻՏԱՌ-ՏԱՍՍ-ը:
Տարածաշրջանային առաջնորդների հետ բանակցությունների գլխավոր
թեմաները, ինչպես սպասվում է, կլինեն պաղեստինա-իսրայելյան խաղաղ
գործընթացի վերակենդանացումը, տարածաշրջանային անվտանգությունը,
ինչպես նաեւ Իրանի միջուկային խնդիրը:
Դիմավորման արարողության ժամանակ Իսրայելի նախագահ Շիմոն
Պերեսը ԱՄՆ-ին կոչ է արել վերջ դնել Իրանի, «Հզբոլլահ» եւ ՀԱՄԱՍ
կազմակերպությունների «խելահեղությանը»: Բուշը բանակցություններ
կվարի նաեւ վարչապետ Էհուդ Օլմերտի հետ: Այդ զրույցի ժամանակ ԱԳՆ
ղեկավար Ցիպի Լիվնին եւ պաշտպանության նախարար Էհուդ Բարաքը ԱՄՆ-ի
նախագահին կտեղեկացնեն պաղեստինա-իսրայելյան բանակցությունների
ընթացքի, անվտանգության ոլորտում տարածաշրջանի իրադրության մասին,
ինչպես նաեւ կներկայացնեն իսրայելյան հետախուզական տվյալները Իրանի
միջուկային ծրագրի վերաբերյալ:
Հինգշաբթի ՄԻացյալ Նահանգների նախագահը բանակցություններ
կանցկացնի Աբբասի հետ, իսկ երեկոյան կվերադառնա Երուսաղեմ:
Այնուհետեւ Ջորջ Բուշը կայցելի Քուվեյթ, Բահրեյն, ԱՄԷ,
Սաուդյան Արաբիա եւ Եգիպտոս, որտեղ հունվարի 16-ին կավարտվի ԱՄՆ-ի
նախագահի ուղեւորությունը: