ՄՈՍԿՎԱ, 22 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Սաուդյան Արաբիայի
թագաժառանգ, Թագավորության պաշտպանության նախարար Սուլթան իբն
Աբդել Ազիզ ալ Սաուդը այցով ժամանել է Ռուսաստան: Ռուսաստանի
ղեկավարության հետ իր հանդիպումների ընթացքում ուշադրության
կենտրոնում կլինեն Մերձավոր Արեւելքի իրադրությունը, երկկողմ
հարաբերությունների ընդլայնման հեռանկարները, ինչպես նաեւ
նոյեմբերի 27-ին Աննապոլիսում սպասվող միջազգային
մերձավորարեւելյան հանդիպման նախապատրաստությունը:
ԻՏԱՌ-ՏԱՍՍ-ին հարցազրույցի ժամանակ Սաուդյան Արաբիայի
թագաժառանգ իշխանը ընդգծել է, որ «ներկայիս այցը նպատակ ունի
ամրապնդել համագործակցությունը քաղաքական, ֆինանսական, տնտեսական
եւ առեւտրի բնագավառներում, գիտատեխնիկական եւ մշակութային
ոլորտներում»: Ըստ նրա, «կքննարկվեն նաեւ կարեւոր տարածաշրջանային
եւ միջազգային խնդիրներ»: