ՄԱՅԻՍԻՆ ԵՐԵՎԱՆՈՒՄ ԿԲԱՑՎԵՆ ԱՅՎԱԶՈՎՍԿՈՒ ԵՎ ՄԱՐՇԱԼ ԲԱՂՐԱՄՅԱՆԻ
ԱՐՁԱՆՆԵՐԸ
14-04-2003 15:30:00 | Հայաստան | Մշակույթ
ԵՐԵՎԱՆ, 14 ԱՊՐԻԼԻ, ՆՈՅՅԱՆ ՏԱՊԱՆ: Մայիսի 1-ին Երեւանում տեղի
կունենա հայտնի ծովանկարիչ Հովհաննես Այվազովսկու արձանի բացումը:
Քանդակագործն է Յուրա Պետրոսյանը, ճարտարապետը` Ստեփան
Քյուրքչյանը: Ինչպես «ՆՈՅՅԱՆ ՏԱՊԱՆ»-ի թղթակցին հայտնեց Երեւանի
փոխքաղաքապետ, գլխավոր ճարտարապետ Նարեկ Սարգսյանը, առաջիկա օրերին
արձանը կտեղափոխվի արվեստանոցից եւ կտեղադրվի Կամերային
երաժշտության տան աստիճանահարթակին:
Ըստ Նարեկ Սարգսյանի, մայիսի 9-ին մայրաքաղաքի Բաղրամյանի
պողոտայում` Հայաստանի Ամերիկյան համալսարանի մոտ, կտեղադրվի
մարշալ Հովհաննես Բաղրամյանի արձանը: