Հոկտեմբերի 5-ին Եվրոպայի խորհրդի Խորհրդարանական վեհաժողովում (ԵԽԽՎ) Հայաստանի զեկույցի վերաբերյալ ելույթ ունենալու համար հերթագրված 10 անհատ պատվիրակներից 4-ը հայ էին, 6-ը՝ ադրբեջանցի: «Առավոտ» օրաթերթի փոխանցմամբ, թեեւ նիստը նախագահողը նախապես հորդորել էր զուսպ խոսել եւ միայն քննարկվող թեմայի շուրջ, ադրբեջանցիները Հայաստանի ժողովրդավարության եւ արտագաղթի մասին «անկեղծ մտահոգություններից» հետո դարձյալ խոսել են «օկուպացիայից» եւ «ագրեսիայից»: «Ծիծաղելի է, որ ադրբեջանցիները մեզ դասեր են տալիս»,- ելույթում հայտարարել է ԵԽԽՎ-ում հայկական պատվիրակության անդամ Արմեն Ռուստամյանը: Իսկ ԵԽԽՎ-ում Հայաստանի հարցով համազեկուցողներից Ջոն Պրեսկոտն ավելի կոշտ է խոսել. «Ինձ թվաց, թե սկսվել է քննարկում Ադրբեջանի մասին»` հավելելով. «Ադրբեջանն աշխարհի ամենաժողովրդավարական հատվածը չէ»: Դիմելով այդ երկրի պատվիրակներին՝ նա կոչ է արել. «Այդ էներգիան, որ այստեղ դահլիճում եք դրսեւորում, ձեր երկրում դրսեւորեք»:

---