Վաշինգտոնում տեղի են ունեցել Հայոց Ցեղասպանութեան 95-ամեայ
տարելիցին նուիրուած միջոցառումներ
26-04-2010 17:24:00 | ԱՄՆ | Քաղաքական
ՎԱՇԻՆԳՏՈՆ, 26 ԱՊՐԻԼԻ, ՆՈՅԵԱՆ ՏԱՊԱՆ: Ապրիլի 24-ին ԱՄՆ-ում
Հայաստանի դեպանության տարածքում գտնուող խաչքարի մօտ տեղի է
ունեցել ծաղկեպսակների զետեղման աւանդական արարողութիւն
Վաշինգտոնում գործող հայկական կազմակերպութիւնների եւ անհատների
անունից:
Ըստ ՀՀ ԱԳՆ Մամուլի եւ տեղեկատուութեան վարչութեան
հաղորդագրութեան, Վաշինգտոնի եւ շրջակայ նահանգների հայ համայնքի
բոլոր թեւերը ներկայացնող մի քանի հարիւր անդամների
մասնակցութեամբ` Վաշինգտոնի Սբ. Մարիամ Աստուածածին եւ Սբ. Խաչ
հայկական եկեղեցիների առաջնորդները մատուցել են հոգեհանգստի ծես`
նուիրուած Հայոց Մեծ Եղեռնի զոհերի յիշատակին:
Ելոյթով հանդէս է եկել ԱՄՆ-ում Հայաստանի դեսպան Թաթուլ
Մարգարեանը, ով իր խօսքում մասնաւորապէս նշել է, որ թուրքական
ժխտողականությունը մոլորութեան մէջ է` իր յոյսը դնելով անցնող
ժամանակի վրայ: Ցեղասպանութեան ոճիրը չունի վաղեմութեան ժամկէտ:
Դեսպանը նաեւ նշել է, որ ժամանակի ընթացքում հայկական սփիւռքը
դառնում է աւելի հզօր եւ աւելի կազմակերպուած, առաւել հետամուտ իր
դատին: Ժամանակը ծնեց նաեւ Հայաստանի անկախ հանրապետութիւն, որը
տարէցտարի աւելի մեծ կարողութեամբ եւ հետեւողականությամբ է տեր
կանգնում հայութեան ազգային իղձերին ու խնդիրներին: Ժամանակը աւելի
է խորացնում փոխըմբռնումն ու միասնականութիւնը Հայաստանի եւ
սփիւռքի միջեւ: Թ.Մարգարեանն ընդգծել է, որ այդ
միասնականութիւնը, հայոց պետականութեան շուրջ ողջ հայութեան
համախմբուածութիւնը, ինչպէս հայրենիքի յետագայ հզօրացման, Արցախի
անկախութեան ամրապնդման, այնպէս էլ Հայոց ցեղասպանութեան
միջազգային ճանաչման եւ դատապարտման հասնելու ամենամեծ գրաւականն
է: