2009թ.-ի յունուար-օգոստոսին Հայաստանի պետական բիւջէի
եկամուտները կազմել են շուրջ 415,5 մլրդ դրամ
02-10-2009 20:00:00 | Հայաստան | Տնտեսութիւն
ԵՐԵՎԱՆ, 2 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: 2009թ.-ի
յունուար-օգոստոս ամիսների ընթացքում Հայաստանի պետական բիւջէի
եկամուտները կազմել են շուրջ 415,5 մլրդ դրամ, իսկ ծախսերը` աւելի
քան 494,5 մլրդ դրամ, որոնք ապահովել են ՀՀ կառավարութեան կողմից
ճշտուած իննամսյա ծրագրի համապատասխանաբար 77,7%-ը եւ 81,4%-ը:
Պետական բիւջէի տարեկան ծրագրային ցուցանիշները կատարուել են
եկամուտների գծով` 46,2%-ով, ծախսերի գծով` 55,2%-ով:
Ըստ ՀՀ Ֆինանսների նախարարութեան Տեղեկատուութեան եւ
հասարակայնութեան հետ կապերի բաժնի հաղորդագրութեան, նախորդ տարուայ
նոյն ժամանակահատուածի համեմատ պետական բիւջէի եկամուտները նուազել
են 14%-ով կամ 67,8 մլրդ դրամով:
Մասնաւորապէս` 18,8%-ով (74,7 մլրդ դրամով) նուազել են հարկերն
ու տուրքերը եւ 8%-ով պաշտօնական դրամաշնորհները, որոնք կազմել են
աւելի քան 2,8 մլրդ դրամ: Նոյն ժամանակահատուածում պարտադիր
սոցիալական ապահովութեան վճարները եւ այլ եկամուտներն աճել են,
համապատասխանաբար, 1,2 մլրդ դրամով (1,8%-ով) եւ 5,9 մլրդ դրամով
(33,1%-ով): Պետական բիւջէի եկամուտների 77,8%-ը ձեւաւորուել է
հարկերի ու տուրքերի, 15,8%-ը` պարտադիր սոցիալական ապահովութեան
վճարների, 5,7%-ը` այլ եկամուտների, 0,7%-ը` պաշտօնական
դրամաշնորհների հաշուին:
«Հայաստանի Հանրապետութեան 2009 թուականի պետական բիւջէի
մասին» ՀՀ օրէնքի 9-րդ յօդուածի 18-րդ կէտին համապատասխան պետական
բիւջէում ներառվել են նաեւ պետական հիմնարկների արտաբիւջէտային
ֆոնդերի միջոցները, որոնց եկամուտները հաշուետու ժամանակահատուածում
կազմել են 11,1 մլրդ դրամ` նախորդ տարուայ 10,5 մլրդ դրամի դիմաց: