Եթէ օրինական ընտրութիւնների արդիւնքում չհաղթենք, ապա
հանգիստ կընդունենք այդ պարտութիւնը,- վստահեցնում է ՀԱԿ-ի
ներկայացուցիչը
28-04-2009 18:00:00 | Հայաստան | Քաղաքական
ԵՐԵՎԱՆ, 28 ԱՊՐԻԼԻ, ՆՈՅԵԱՆ ՏԱՊԱՆ: Հայաստանը կանգնած է
լրջագույն քաղաքական զարգացումների շեմին, եւ երկրում առկայ մի շարք
մարտահրավերներ յաղթահարելու համար իշխանութիւնները նախ պէտք է
ստեղծեն ազգային համաձայնութեան մթնոլորտ: Նման համոզմունք յայտնեց
ապրիլի 28-ի ասուլիսում Հայ Ազգային կոնգրեսի ներկայացուցիչ Լեւոն
Զուրաբյանը: Սակայն, ըստ նրա, այսօրուայ դրութեամբ իշխանութիւնները
ընտրել են միանգամայն հակառակ ճանապարհ:
«Նրանք շարունակում են 2008թ.-ի մարտի 1-ից սկսած ռեպրեսիւ
պատերազմը սեփական ժողովրդի դէմ. բանտերում են պահւում 55
քաղբանտարկյալներ, խախտւում են ազատ հաւաքներ եւ իշխանութեան
օրինական ընտրութիւններ անցկացնելու իրաւունքները»,- ասաց
Լ.Զուրաբյանը:
Ըստ նրա, մինչ համազգային խնդիրներ կարգավորելը Հայաստանի
իշխանութիւնները պէտք է լուծեն եւ կարգաւորեն ներազգային հարցերը:
Լ.Զուրաբյանի խօսքերով, այսօր պէտք է դիտարկել ոչ թէ հայ-թուրքական
յարաբերութիւնների «Ճանապարհային քարտէզ»-ը, այլ` ազգային ներքին
հաշտեցման «ճանապարհային քարտէզ»ը: Այսինքն, ըստ նրա, պէտք է ազատ
արձակել քաղբանտարկյալներին, երկրում վերականգնել ժողովրդավարական
ազատութիւնները եւ այլն:
Լ.Զուրաբյանը նշեց, որ մայիսի 31-ին Երեւանի աւագանու
ընտրութիւնները օրինական անցկացնելը ՀԱԿ-ի համար սկզբունքային
հարց է: «Եթէ մենք օրինական ընտրութիւնների արդիւնքում չհաղթենք,
ապա շատ հանգիստ կընդունենք այդ պարտութիւնը: Սակայն արդէն բոլոր
գործընթացները ցոյց են տալիս, որ իշխանութիւնները պատրաստ չեն
օրինական ընտրութիւններ անցկացնելու: Նրանք արդէն սկսել են
օրինախախտումների մի հսկայական գործընթաց»,- ասաց նա: