Ալիկ Սարգսեան. «Հիւսիսային պողոտան պատկանում է ժողովրդին,
եւ բոլորը կարող են այնտեղ քայլել»
28-04-2009 17:40:00 | Հայաստան | Քաղաքական
ԵՐԵՎԱՆ, 28 ԱՊՐԻԼԻ, ՆՈՅԵԱՆ ՏԱՊԱՆ: Երեւանի Հիւսիսային
պողոտան պատկանում է ժողովրդին, բոլորը կարող են այնտեղ քայլել եւ
որեւիցէ նշանակութիւն չունի, թէ ո'ր շէնքը ո'ր իշխանութեան օրոք է
կառուցուել: Ապրիլի 28-ի ասուլիսում այս մասին յայտարարեց ՀՀ
Ոստիկանութեան պետ, ոստիկանութեան գեներալ-մայոր Ալիկ Սարգսեանը:
Յիշեցնենք, որ Ոստիկանութեանը կից հասարակական խորհրդի ապրիլի
22-ի նիստի աւարտին ոստիկանապետը խորհուրդ էր տուել ընդդիմությանը
քաղաքական զբոսանքների համար այլ վայր փնտրել: Ա.Սարգսեանն ասել
էր, որ Հիւսիսային պողոտան կառուցուել է ներկայ իշխանութիւնների
օրոք, ուստի ընդդիմութեան քաղաքական զբոսանքների համար կարելի է
փնտրել նախկին իշխանութիւնների օրոք կառուցոուած որեւէ այլ վայր:
Ա.Սարգսեանը պարզաբանեց, որ ապրիլի 22-ի նիստից յետոյ լրագրողի
հետ մտերմիկ զրոյցում նա ընդամէնը կատակել է: «Մե՞նք որ փողոցով
իրաւունք ունենք քայլելու, եթէ 90 տոկոսը կոմունիստների օրոք է
կառուցուել»,- ասաց ոստիկանապետը: Ըստ նրա, Հիւսիսային պողոտայի
վերաբերեալ իր պահանջը եղել է միայն` չխախտել հասարակական կարգը,
զանգվածային միջոցառումներն անցկացնել օրէնքի սահմաններում եւ
չվերածել դրանք զանգվածային անկարգութիւնների: Նա խորհուրդ տվեց
լրագրողներին չկառչել բառերից, ընկերական խօսակցութիւնները
չվերածել քաղաքական լուրջ յայտարարութեյան եւ իրեն քաղաքականութեան
մէջ չներքաշել: «Ոստիկանութիւնը ապաքաղաքականացուած կառոյց է»,-
ասաց նա:
Ա.Սարգսեանը հերքեց մամուլում յայտնուած տեղեկությունները, թէ
ոստիկանները նախօրէին ընդդիմութեան մայիսի 1-ի հանրահաւաքի մասին
իրազեկող թռուցիկներն են հաւաքել: «Ոչ մի ոստիկան ոչ մէկի ձեռքից
որեւէ թռուցիկ չի հաւաքել, ինչպէս նաեւ չի պաշտպանել թռուցիկներ
խլող անձանց»,- ասաց ոստիկանապետը: