Հայաստանի նախագահը երկկողմ հանդիպումներ է ունենում Դաւոսում
29-01-2009 23:00:00 | | Քաղաքական
ԴԱՎՈՍ, 29 ՅՈՒՆՎԱՐԻ, ՆՈՅԵԱՆ ՏԱՊԱՆ: Համաշխարհային տնտեսական
համաժողովի առթիւ այցով Դաւոսում գտնուող Հայաստանի նախագահ Սերժ
Սարգսեանը յունվարի 29-ին հանդիպում է ունեցել Միջուկային
էներգիայի միջազգային գործակալութեան գործադիր տնօրէն Մուհամմեդ Էլ
Բարադեի հետ: Հանդիպման ընթացքում կողմերը բարձր են գնահատել
միջուկային էներգիայի ոլոտում միջազգային գործակալութեան եւ
Հայաստանի համագործակցութեան ներկայ մակարդակը: Հանդիպման ժամանակ
քննարկուել են Հայաստանում նոր միջուկային էներգաբլոկի կառուցմանը
վերաբերող հարցեր: Մուհամմեդ Էլ Բարադեյը բարձր է գնահատել նոր
էներգաբլոկի կառուցման ուղղութեամբ մինչ օրս հայաստանեան
իշխանութիւնների կողմից ձեռնարկուած քայլերը եւ պատրաստակամութիւն
յայտնել` տրամադրելու փորձագիտական օժանդակություն ծրագրի
իրականացման տարբեր փուլերում: Նա նաեւ բարձր է գնահատել Մեծամօրի
ատոմային էլեկտրակայանի անվտանգութեան բարձրացմանն ուղղուած
քայլերը:
Նոյն օրը ՀՀ նախագահը հանդիպում է ունեցել նաեւ Ասիական
զարգացման բանկի նախագահ Հարուհիկո Կուրոդայի հետ: Ս.Սարգսեանը
գոհունակութիւն է յայտնել կառավարման բնագաւառում եւ
ենթակառուցուածքների զարգացման ուղղութեամբ Հայաստանին Ասիական
զարգացման բանկի կողմից մինչ օրս ցուցաբերուող աջակցութեան համար եւ
հոյս յայտնել, որ այդ համագործակցութիւնն իր շարունակութիւնը
կունենայ նաեւ ապագայում:
Իր հերթին Հարուհիկո Կուրոդան նշել է, որ Ասիական զարգացման
բանկը շահագրգռուած է զարգացնելու երկարաժամկէտ գործընկերային
յարաբերութիւնները Հայաստանի հետ` կարեւորելով բոլոր առկայ
գործիքների արդիւնաւէտ համադրումը:
Ինչպէս «ՆՈՅԵԱՆ ՏԱՊԱՆ»-ին յայտնեցին ՀՀ նախագահի Մամլոյ
գրասենեակից, նոյն օրը Ս.Սարգսեանը հանդիպումներ կունենայ
Ռուսաստանի Դաշնութեան կառավարութեան ղեկավար Վլադիմիր Պուտինի,
Շվեյցարիայի Համադաշնութեան նախագահ Հանս Ռուդոլֆ Մերցի հետ: Ուշ
երեկոյեան նախատեսուած է նաեւ Ս.Սարգսեյանի հանդիպումը Թուրքիայի
վարչապետ Ռեջեփ Թայիփ Էրդողանի հետ: