Եվրազեսի անդամ երկրների համար առաջիկայ ամիսներին կձեւաւորուի
Կայունացման հիմնադրամ
02-04-2009 19:30:00 | Հայաստան | Տնտեսութիւն
ԵՐԵՎԱՆ, 2 ԱՊՐԻԼԻ, ՆՈՅԵԱՆ ՏԱՊԱՆ: Մարտի 31-ին Մոսկուայում
կայացած ԱՊՀ անդամ երկրների ֆինանսների նախարարների մշտապէս գործող
խորհրդակցութեան երկրորդ նիստում քննարկուել են ֆինանսատնտեսական
ճգնաժամին դիմակայելու, ինչպէս նաեւ համաշխարհային տնտեսական ու
ֆինանսական համակարգի բարեփոխումների հետ կապուած խնդիրներ: Այս
մասին ապրիլի 2-ի ասուլիսում յայտնեց Հայաստանի ֆինանսների նախարար
Տիգրան Դավթեանը:
Ըստ նրա, մինչ հանդիպումը մասնակից երկրների
ներկայացուցիչները ծանօթացել են այդ հարցերի վերաբերեալ Ռուսաստանի
ներկայացրած տեսակետին, իսկ դրանք, Տ.Դաւթեանի խօսքերով, մօտ են
եղել հայկական կողմի մօտեցումներին: Նախարարը նշեց, որ հանդիպման
արդիւնքում խնդրի շուրջ ձեւաւորուել է ընդհանուր մօտեցում, որը
«G20»-ում` Լոնդոնում ընթացող 20 խոշորագոյն երկրների ղեկավարների
գագաթաժողովում, կներկայացնի Ռուսաստանը:
ԱՊՀ-ի անդամ երկրների ֆինանսների, էկոնոմիկայի եւ կենտրոնական
բանկերի ղեկավարները Մոսկուայում մասնակցել են նաեւ Եւրասիական
տնտեսական համագործակցութեան 7-րդ նիստին: Ըստ Տ.Դաւթեանի, այդ
նիստում առաջարկուել է Եվրազեսի անդամ երկրների շրջանակներում
ձեւաւորել Կայունացման հիմնադրամ` մինչեւ 10 մլրդ ԱՄՆ դոլար
ընդհանուր գումարով: Ներկայումս հիմնադրամի ձեւաւորման
աշխատանքները գտնւում են աւարտական փուլում: Նախարարը նշեց, որ
հիմնադրամի ձեւաւորման վերաբերեալ համաձայնութիւնը ձեռք է բերուել
անդամ երկրների նախագահների մակարդակով:
Հիմնադրամը հիմնականում իրականացնելու է մակրոտնտեսական
կայունացման, ինչպէս նաեւ ենթակառուցվածքային զարգացմանն ուղղուած
ծրագրեր: «Այս հիմնադրամը մեզ հնարաւորութիւն կտայ առաջիկայում
նաեւ լրացուցիչ ռեսուրսներ ներգրաւելու ենթակառուցուածքների
զարգացման նպատակով»,- նշեց Տ.Դավթեանը: