2009 Թ.-Ի ՊԵՏԲԻՒՋԷՈՎ ԱՆՆԱԽԱԴԷՊ ԾԱԽՍԵՐ ԵՆ ՆԱԽԱՏԵՍՈՒԱԾ
ԲՆԱԿԱՐԱՆԱՅԻՆ ՇԻՆԱՐԱՐՈՒԹԵԱՆ ՀԱՄԱՐ
07-10-2008 20:00:00 | Հայաստան | Տնտեսութիւն
ԵՐԵՎԱՆ, 7 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: 2009թ.-ի պետական
բիւջէի նախագծով նախատեսւում է, որ յաջորդ տարի Հայաստանում տնտեսական աճը
կկազմի 9,2%: Այս մասին հոկտեմբերի 7-ի ասուլիսում յայտնեց Ազգային
Ժողովի Ֆինանսավարկային եւ բիւջէտային հարցերով մշտական
յանձնաժողովի նախագահ, Հանրապետական կուսակցութեան խորհրդի անդամ
Գագիկ Մինասեանը: Նա նաեւ նշեց, որ դեֆիցիտը 2009թ.-ին կկազմի
0,95%, ինչը շատ լաւ ցուցանիշ է: Եւրոմիութեան չափանիշներով,
ինչպէս ընդգծեց Գ.Մինասեանը, ռիսկային է համարւում 3%-ից աւելի
դեֆիցիտը:
Եկող տարուայ բիւջէով, ըստ նրա, ընդհանուր ծախսերը կաւելանան
15%-ով: Աննախադէպ կլինի բնակարանային շինարարութեան համար
նախատեսուած ծախսը. նախորդ տարուայ համեմատութեամբ 2009-ին այն կաճի
20%-ով` հասնելով 23,7 մլրդ դրամի (մօտ 79 մլի ԱՄՆ դոլար):
Կրթութեան ոլորտում ծախսերը կաւելանան 22,5%-ով, առողջապահութեան
բնագաւառում` 20%-ով: 2009թ.-ի բիւջէով, Գ.Մինասեանի խօսքերով,
հոգածության տակ են լինելու յատկապէս այն ոլորտները, որոնք
«հիմնուած են մարդկային ռեսուրսների վրայ` բժշկութիւն, կրթութիւն,
մշակոյթ»: Նոր բիւջէն նախատեսում է նաեւ հարկային եկամուտների
22,1%-ով աճ, ինչը, ըստ նրա, բաւականին մեծ ցուցանիշ է եւ վկայում
է ստվերի դէմ իշխանութիւնների պայքարի արդիւնաւէտութեան մասին:
ինչ վերաբերում է գնաճին, ապա այն, ԱԺ մշտական յանձնաժողովի
նախագահի գնահատմամբ, 2008թ.-ին շատ բարձր էր, թէեւ ԱՊՀ-ի
տարածքում առկայ ցուցանիշների հետ համեմատած այնքան էլ վատ
մակարդակի վրայ չէր: Այնուամենայնիւ, ըստ Գ.Մինասեանի,
կառավարութիւնը հասկանում է, թէ որքան վատ է անդրադառնում գնաճը
բնակչութեան յատկապէս սոցիալապէս անապահով խաւի վրայ, հետեւաբար,
այժմ քայլեր են ձեռնարկւում, որպէսզի 2009թ.-ին գնաճը չգերազանցի
5%-ը: