2009 Թ.-Ի ՊԵՏԲՅՈՒՋԵՈՎ ԱՆՆԱԽԱԴԵՊ ԾԱԽՍԵՐ ԵՆ ՆԱԽԱՏԵՍՎԱԾ
ԲՆԱԿԱՐԱՆԱՅԻՆ ՇԻՆԱՐԱՐՈՒԹՅԱՆ ՀԱՄԱՐ
07-10-2008 20:00:00 | Հայաստան | Տնտեսություն
ԵՐԵՎԱՆ, 7 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: 2009թ.-ի պետական
բյուջեի նախագծով նախատեսվում է, որ հաջորդ տարի Հայաստանում տնտեսական աճը
կկազմի 9,2%: Այս մասին հոկտեմբերի 7-ի ասուլիսում հայտնեց Ազգային
Ժողովի Ֆինանսավարկային եւ բյուջետային հարցերով մշտական
հանձնաժողովի նախագահ, Հանրապետական կուսակցության խորհրդի անդամ
Գագիկ Մինասյանը: Նա նաեւ նշեց, որ դեֆիցիտը 2009թ.-ին կկազմի
0,95%, ինչը շատ լավ ցուցանիշ է: Եվրոմիության չափանիշներով,
ինչպես ընդգծեց Գ.Մինասյանը, ռիսկային է համարվում 3%-ից ավելի
դեֆիցիտը:
Եկող տարվա բյուջեով, ըստ նրա, ընդհանուր ծախսերը կավելանան
15%-ով: Աննախադեպ կլինի բնակարանային շինարարության համար
նախատեսված ծախսը. նախորդ տարվա համեմատությամբ 2009-ին այն կաճի
20%-ով` հասնելով 23,7 մլրդ դրամի (մոտ 79 մլի ԱՄՆ դոլար):
Կրթության ոլորտում ծախսերը կավելանան 22,5%-ով, առողջապահության
բնագավառում` 20%-ով: 2009թ.-ի բյուջեով, Գ.Մինասյանի խոսքերով,
հոգածության տակ են լինելու հատկապես այն ոլորտները, որոնք
«հիմնված են մարդկային ռեսուրսների վրա` բժշկություն, կրթություն,
մշակույթ»: Նոր բյուջեն նախատեսում է նաեւ հարկային եկամուտների
22,1%-ով աճ, ինչը, ըստ նրա, բավականին մեծ ցուցանիշ է եւ վկայում
է ստվերի դեմ իշխանությունների պայքարի արդյունավետության մասին:
ԻՆչ վերաբերում է գնաճին, ապա այն, ԱԺ մշտական հանձնաժողովի
նախագահի գնահատմամբ, 2008թ.-ին շատ բարձր էր, թեեւ ԱՊՀ-ի
տարածքում առկա ցուցանիշների հետ համեմատած այնքան էլ վատ
մակարդակի վրա չէր: Այնուամենայնիվ, ըստ Գ.Մինասյանի,
կառավարությունը հասկանում է, թե որքան վատ է անդրադառնում գնաճը
բնակչության հատկապես սոցիալապես անապահով խավի վրա, հետեւաբար,
այժմ քայլեր են ձեռնարկվում, որպեսզի 2009թ.-ին գնաճը չգերազանցի
5%-ը: