«ԻՄ ՍԻՐՏԸ ԼԵՌՆԵՐՈՒՄ Է» ՊԻԵՍԸ ԿՆԵՐԿԱՅԱՑՆԵՆ ՉԵԽ ԴԵՐԱՍԱՆՆԵՐԸ
09-10-2008 18:40:00 | Հայաստան | Մշակոյթ
ԵՐԵՎԱՆ, 9 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Չեխիայում բնակուող
երիտասարդ ռեժիսոր Անդրան Աբրահամեանը մասնակցում է «Հայֆեստ»
միջազգային 6-րդ երեւանեան փառատօնին` Վ.Սարոեանի «Իմ սիրտը
լեռներում է» ստեղծագործութեան բեմականացումով: 2001 թուականին
հիմնադրուած չեխական «Անէքսյուզդ» թատրոնում բեմադրուած այս պիեսի
պրեմիերան կկայանայ Կամերային թատրոնում հոկտեմբերի 9-ին: 23-ամեայ
ռեժիսորի խօսքերով, թէեւ ներկայացման մէջ ներգավված դերասանները
ազգութեամբ չեխեր են, սակայն շատ լաւ զգացել են Սարոեանի շունչն ու
հոգին:
Նոյն օրը լրագրողների հետ հանդիպման ժամանակ երիտասարդ
արուեստագէտը նշեց, որ Սարոեանի այդ գործը ինքը թարգմանել է
չեխերեն, ապա նոր` սկսել բեմադրել: «Ես շատ եմ սիրում Սարոեանի
ստեղծագործությունները եւ կարդացել եմ գրեթէ բոլոր գործերը:
Սկզբում ուզում էի բեմադրել «Վագրը» պատմուածքը, սակայն յետոյ
որոշեցի բեմադրել «Իմ սիրտը լեռներում է» պիեսը, քանի որ այդ երկու
գործերը հեղինակը գրել է նոյն ժամանակահատուածում` 30-ական
թուականներին, եւ համահունչ են իրար»,- նշեց նա:
Պիեսը բեմադրելուց յետոյ նա կապ է հաստատել Սարոեանի որդու`
Արամի հետ` խնդրելով հեղինակային իրաւունքի թույլտվություն: