ՓԱԽՍՏԱԿԱՆ ՔՈՒՅՐ ՈՒ ԵՂԲԱՅՐԸ ՍՏԱՑԵԼ ԵՆ ԻՐԵՆՑ ՀԱՍԱՆԵԼԻՔ
ԲԳՎ-ՆԵՐԸ
18-07-2008 17:10:00 | Հայաստան | Մարդու իրաւունքներ
ԵՐԵՎԱՆ, 18 ՅՈՒԼԻՍԻ, ՆՈՅԵԱՆ ՏԱՊԱՆ: 1990թ.-ին քաղաքացի
ընտանիքի հետ գաղթել էր Բաքուից եւ բնակուել Արզնիի թիւ 1
առողջարանում: Ի սկզբանէ նրա ընտանիքը կազմուած էր չորս անդամից:
Յետագայում նրա եղբայրը ամուսնացել է եւ կազմել առաձին ընտանիք:
1993թ.-ից ինքը` մոր հետ, եւ եղբոր ընտանիքը ապրում են առաձին`
զբաղեցնելով առողջարանի 10-րդ եւ 16-րդ սենեակները: Սակայն, երբ
սկսուել է բնակարանի գնման վկայագիր (ԲԳՎ) տրամադրելու գործընթացը,
իրենց տրուել է մէկ ԲԳՎ` երկու ընտանիքի համար:
Այս հարցի կապակցութեամբ Մարիա Բ.-ն դիմել է ՀՀ տարածքային
կառավարման նախարարութեան Միգրացիոն գործակալութիւն, սակայն
մերժուել է: 2007թ.-ի հոկտեմբերի 29-ին նա դիմել է ՀՀ Մարդու
իրաւունքների պաշտպան Արմէն Յարութիւնյանին` խնդրելով աջակցել այդ
հարցի լուծման գործում:
Առաջնորդուելով «Մարդու իրաւունքների պաշտպանի մասին» ՀՀ
օրէնքի 12-րդ յօդուածով, Ա.Յարութիւնեյանը նամակ է յղել Կոտայքի
մարզպետ Կովալենկո Շահգալդյանին` ակնկալելով 10-օրեայ ժամկէտում
վերոնշեալ խնդրի կապակցութեամբ պարզաբանման հետ մէկտեղ ստանալ նաեւ
հիմնաւորող փաստաթղթերի պատճեները :
Ինչպէս «ՆՈՅԵԱՆ ՏԱՊԱՆ»-ին յայտնում են ՀՀ Մարդու իրաւունքների
պաշտպանի աշխատակազմի Տեղեկատուութեան եւ հասարակայնութեան հետ
կապերի բաժնից, ի պատասխան Կ.Շահգալդյանը 10.12.07թ. գրութեամբ
յայտնել է, որ Արզնի թիւ 1 առողջարանի բնակիչ, փախստական Մարիա
Բ.-ի ընտանիքին բնակարանի գնման վկայագրերի տրամադրման
յանձնաժողովի որոշմամբ տրամադրվել է բնակարանի գնման երկու
վկայագիր: