ՀԱՅԱՍՏԱՆՆ ԱՌԱՋԻՆ ԱՆԳԱՄ ԿՄԱՍՆԱԿՑԻ WFTGA-Ի ՀԱՄԱԳՈՒՄԱՐԻՆ
19-01-2007 19:38:00 | Հայաստան | Տնտեսութիւն
ԵՐԵՎԱՆ, 19 ՅՈՒՆՎԱՐԻ, ՆՈՅԵԱՆ ՏԱՊԱՆ: Հայաստանն առաջին անգամ
մասնակցում է Զբոսավարների ասոցիացիաների համաշխարհային
ֆեդերացիայի (WFTGA) յունվարի 19-ին Կահիրէում մեկնարկած
համագումարին: Այս մասին «ՆՈՅԵԱՆ ՏԱՊԱՆ»-ի թղթակցի հետ զրոյցում
յայտնեց ԱՄՆ Միջազգային զարգացման գործակալութեան (USAID)
«Մրցունակ մասնաւոր հատուած Հայաստանում» ծրագրի (CAPS) գործարար
միութիւնների փորձագէտ Արմէն Շահբազեանը:
«Ես եւ Հայաստանի զբոսավարների գիլդիայի (ՀԶԳ) նախագահ Լիաննա
Գրիգորեանը WFTGA-ի գործադիր խորհրդին ենք ներկայացնելու Հայաստանի
զբօսաշրջութեան զարգացման հայկական գործակալութեան (ԶԶՀԳ)
տեղեկատուական նիւթերը, որոնք համագումարի մասնակիցներին
հնարաւորութիւն կտան ծանօթանալու Հայաստանի զբօսաշրջութեան ոլորտի
հնարաւորութիւններին»,- ասաց Ա.Շահբազեանը:
Նրա խօսքերով, WFTGA-ի համագումարները կազմակերպւում են երկու
տարին մէկ անգամ: Նշուեց նաեւ, որ WFTGA-ին անդամակցում է 40 երկիր,
այդ թւում` ԱՊՀ երկրներից Ռուսաստանն ու Հայաստանը: ՀԶԳ-ն WFTGA-ի
լիիրաւ անդամ է 2005թ.-ից:
Համագումարն աւարտուելու է յունվարի 26-ին: