ՀՅԴ Արեւմտեան Ամերիկայի Կենտրոնական կոմիտէն օգոստոսի 19-ին խիստ գնահատականներով յայտարարութիւն է ընդունել, որտեղ մերժել է կազմակերպութեան մասնակցութիւնը Լոս Անջելեսում ՀՀ անկախութեան 20-ամեակին նուիրուած ճաշկերոյթին:
ՀՅԴ մամլոյ դիւանի խնդրանքով մեկնաբանելով այդ յայտարարութիւնը, ՀՅԴ Բիւրոյի Հայ Դատի եւ քաղաքական հարցերի գրասենեակի պատասխանատու Կիրոյ Մանոյեանն ասել է.
«Յայտարարութիւնն արտայայտում է Կենտրոնական կոմիտէի դիրքորոշումը եւ թերեւս արդիւնք է գաղութում առկայ որոշակի տրամադրութիւնների: Հասկանալի է, որ Հհ-ում կուտակուել են բազմաթիւ հիմնահարցեր, առկայ են բազմաթիւ չլուծուած խնդիրներ: Բայց 20-ամեայ տարելիցն մեր ընդհանուր յաղթանակի եւ ձեռքբերումների ամրագրումն է: Մենք իրաւունք չունենք այս մակարդակի միջոցառումներում անձնաւորուած յարաբերութիւններով եւ յուզական քայլերով առաջնորդուելու, այլ` առիթը պէտք է օգտագործենք, մնալով հանդերձ մեր սկզբունքային դիրքերում, նման միջոցառումներով արտայայտելու մեր միասնականութիւնն ու համախմբուածութիւնը»: