Ընթերցանության հանրապետական առաջին մրցույթի կիսաեզրափակիչ փուլը սկսված է
17-11-2011 19:40:53 | Հայաստան | Մշակույթ
"Ժամանակ մի կորցրո՜ւ, կարդա՜" նշանաբանով ընթերցանության հանրապետական մրցույթի կիսաեզրափակիչ փուլն Արարատի մարզում անցկացվեց մարզկենտրոն Արտաշատում: Մրցույթն անցկացվել է տարիքային երկու խմբերի` 2-4-րդ եւ 5-7-րդ դասարանների աշակերտների շրջանում, որոնցից եզրափակիչ փուլ են անցել 3-ական աշակերտ:
"Երեւան-2012 գրքի համաշխարհային մայրաքաղաք" միջոցառման շրջանակներում կազմակերպված ընթերցանության հանրապետական առաջին մրցույթն անց է կացվում "Էդիթ Պրինտ" հրատարակչության եւ Երեւանի քաղաքապետարանի անմիջական աջակցությամբ: Այն նպատակ ունի բարձրացնել ընթերցանության ցուցանիշը բնակչության` հատկապես երեխաների շրջանում:
Հրատարակչության կողմից մրցույթի մասնակիցներին տրվել են պատվոգրեր, գրքեր եւ զեղչի կտրոններ, որոնցով մարզի երեխաները կարող են նույն մարզի վաճառակետերից օգտվել 20% զեղչից: Իսկ մրցույթին չմասնակցած աշակերտների համար անցկացվեց վիկտորինա, որի ընթացքում հարցերին ճիշտ պատասխանած երեխաները նույնպես ստացան նվերներ: Կազմակերպվել էին նաեւ հանդիպումներ "Էդիթ Պրինտ" հրատարակչության կողմից թողարկվող "Ուրախ գնացք" մանկական եւ "Իմ մոլորակը" պատանեկան ամսագրերի խմբագրակազմի հետ:
Արտաշատի թիվ 5 դպրոցում հրատարակչությունը կազմակերպել էր նաեւ մանկապատանեկան գրքերի ցուցահանդես-վաճառք, որի ժամանակ գրքերը վաճառում էին ինքնարժեքից ցածր գներով:
Այս բոլոր միջոցառումներն իրականացվել եւ դեռ կիրականացվեն ընթերցանության հանրապետական առաջին մրցույթի կիսաեզրափակիչ փուլին զուգահեռ, որն, ինչպես մրցույթի պատասխանատուներն են ասում, բոլոր մարզերում էլ վերածվելու է գրքի իսկական տոնի:
Մրցույթի եզրափակիչ փուլը տեղի կունենա 2012թ-ի փետրվարին, Երեւանում։ Եզրափակիչ փուլի մասնակիցների ցուցակը կհայտարարվի մարզերում եւ Երեւանում կիսաեզրափակիչ փուլի ավարտից հետո: