Մայիսի 14-ին Փարիզի Հայ առաքելական եկեղեցու «Ֆռնջյան» սրահում տեղի ունեցավ «Հայոց ցեղասպանությունը արտասահմանյան մամուլի առաջին էջերին» խորագրով ժամանակավոր ցուցադրության բացումը: Ցուցադրությունը կազմակերպվել էր Հայոց ցեղասպանության թանգարան-ինստիտուտի եւ Փարիզի Հայ առաքելական եկեղեցու համատեղ ջանքերով: Բացման արարողությանը ներկա էին ֆրանսահայ գաղութի ներկայացուցիչներ եւ պաշտոնական հրավիրյալներ, ՀՀ արտակարգ եւ լիազոր դեսպան Վիգեն Չիթեչյանը, Կլամարի եւ Արնուվիլի քաղաքապետերը: Ցուցադրությունը կազմակերպվել էր Հայոց ցեղասպանության թանգարան-ինստիտուտի եւ Փարիզի Հայ առաքելական եկեղեցու համատեղ ջանքերով: Հայոց ցեղասպանության թանգարան-ինստիտուտի հավաքածուի մաս կազմող արտասահմանյան մամուլի այս ընտրանին ձեռք է բերվել կիպրահայ բարերար Տիգրան Քալայջյանի աջակցությամբ: Բացման խոսքով հանդես եկան Հայ առաքելական եկեղեցու Ֆրանսիայի թեմի առաջնորդ Նորվան Արք. Զաքարյանը, Ֆրանսիայի ծխական խորհուրդի ատենապետ Պատրիս Ճոլոլյանը եւ ՀՑԹԻ տնօրեն Հայկ Դեմոյանը: Բացման իր խոսքում ՀՑԹԻ տնօրեն Հ. Դեմոյանը նշեց. «Այս ցուցադրությունը բացառիկ է այն առումով, որ այն հավելյալ մեկնաբանությունների կարիք չունի: Ներկայացված նյութերը վերստին ապացուցելով Հայոց ցեղասպանության պատմական փաստը, միաժամանակ հաստատում են այն կարիքը, որ այն երկիրը, որն իրագործեց ցեղասպանությունը եւ ներկայումս ժխտում է դրա եղելությունը, պետք է դատապարտվի մարդկության ու քաղաքակրթության օրենքներով»: Բազմաթիվ ֆրանսահայեր ու ցուցադրության բացմանը մասնակցած ֆրանսիացի հյուրեր դրականորեն արձագանքեցին նման ցուցադրության բացման կապակցությամբ` կարեւորելով այն արտասահմանյան երկրներում ցեղասպանության մասին իրազեկության մակարդակը բարձրացնելու տեսանկյունից: Ցուցադրության բացման արարողության ընթացքում ՀՑԹԻ տնօրեն Հայկ Դեմոյանը Ֆրանսիայի ծխական թեմի ատենապետ Պատրիս Ճոլոլյանին հանձնեց ՀՑԹԻ «Ոսկյա մեդալը»` ի նշան երախտագիտության Ճոլոլյան ընտանիքի կողմից թանգարանին նվիրված բացառիկ փաստաթղթերի ու արժեքավոր թանգարանային միավորների: Այս ցուցադրությամբ Հայոց ցեղասպանության թանգարան - ինստիտուտը ներկայացնում է տարբեր խորագրերով ժամանակավոր ցուցադրությունների շարքի ներկայացումը արտասահմանյան մի շարք քաղաքներում: 2011թ. ընթացքում ՀՑԹԻ նախաձեռնությամբ եւ տեղի հայ համայնքների ու թանգարանի գործընկերների համատեղ ջանքերով տարբեր խորագրերով ժամանակավոր ցուցադրություններ են բացվելու Բուենոս Այրեսում, Լոս Անջելեսում, Օսլոյում, Կոպենհագենում եւ Ստոկհոլմում:

---