Ադրբեջանը չի պատրաստվում ղարաբաղյան խնդիրը լուծել
քաղաքակիրթ ճանապարհով,- ասում է Արամ Սաֆարյանը
01-03-2010 15:00:00 | Հայաստան | Քաղաքական
ԵՐԵՎԱՆ, 1 ՄԱՐՏԻ, ՆՈՅՅԱՆ ՏԱՊԱՆ: Վերջին տարիներին Ադրբեջանն
ուժեղացրել է հակահայկական քարոզչությունը եւ առիթը բաց չի թողնում
Եվրոխորհրդի Խորհրդարանական վեհաժողովի (ԵԽԽՎ) ամբիոնից Հայաստանին
որպես ագրեսոր ներկայացնելու համար: Այսպիսի հայտարարություն արեց
ԵԽԽՎ-ում հայկական պատվիրակության անդամ, ՀՀ Ազգային Ժողովի
«Բարգավաճ Հայաստան» խմբակցության քարտուղար Արամ Սաֆարյանը մարտի
1-ի ասուլիսում: Նրա խոսքերով, բանակցություններ վարող եւ
հակամարտության կարգավորման փոխհամաձայնեցված տարբերակի ձգտող
երկիրը չպետք է սրի իրավիճակը եւ ազգամիջյան թշնամանք հրահրի:
Սակայն Ադրբեջանը, ինչպես եզրակացրեց Ա.Սաֆարյանը, իր պահվածքով
ապացուցում է, որ չի պատրաստվում ղարաբաղյան խնդիրը լուծել
քաղաքակիրթ ճանապարհով եւ ուզում է վերսկսել ռազմական
գործողությունները: Սակայն, ըստ ԲՀԿ-ական գործչի, ԵԽԽՎ-ի
պատգամավորների ճնշող մեծամասնությունը կարծում է, որ խնդիրը
պատերազմով չի կարող լուծվել:
Ա.Սաֆարյանը նշեց նաեւ, որ ԵԽԽՎ-ի վերջին` ձմեռային,
նստաշրջանում ի պատասխան Ադրբեջանի պատվիրակների այն պնդումների,
թե Ղարաբաղում մայիսի 23-ին սպասվող խորհրդարանական
ընտրություններն անօրինական են, ինքը ԵԽԽՎ պատգամավորներին
առաջարկել է ընտրությունների ժամանակ դիտորդական առաքելությամբ
այցելել Ղարաբաղ, եւ հետո միայն եզրակացություններ անել: