ՀՅԴ-ն դատապարտում է Հայաստանի Արտգործնախարարության կողմից
Թուրքիայի հետ ապրիլի 22-ի հայտարարության ստորագրումը
23-04-2009 18:40:00 | Հայաստան | Քաղաքական
ԵՐԵՎԱՆ, 23 ԱՊՐԻԼԻ, ՆՈՅՅԱՆ ՏԱՊԱՆ: Հայաստանի եւ Թուրքիայի
արտգործնախարարությունների ապրիլի 22-ի համատեղ հայտարարության
կապակցությամբ ՀՅ Դաշնակցությունը հանդես է եկել հայտարարությամբ`
ներկայացնելով այդ փաստի վերաբերյալ իր կոշտ դիրքորոշումը, եւ
հայտնելով կոալիցիային իր մասնակցության նպատակահարմարության հարցը
առաջիկա օրերին քննարկելու մտադրության մասին:
ՀՅԴ-ի հայտարարությունում ասված է.
«Հայ-թուրքական հարաբերությունների կարգավորումը վերջին
ամիսներին եղել է Հայաստանի պետական-քաղաքական օրակարգի առանցքային
հարցը:
ՀՅ Դաշնակցությունը բազմիցս հայտարարել է, որ երկու երկրների
միջեւ բարիդրացիական հարաբերություններ կարող են հաստատվել
Թուրքիայի կողմից Հայոց ցեղասպանության ճանաչմամբ եւ հայ ժողովրդի
իրավունքների վերականգնմամբ միայն: Առանց նախապայմանների
շրջափակման վերացումը եւ դիվանագիտական հարաբերությունների
հաստատումը այդ ճանապարհի սոսկ առաջին քայլերը կարող են լինել: Մեզ
համար բացարձակապես անընդունելի է Թուրքիայի հետ
հարաբերությունների բնականոնացումը մեր պետության ինքնիշխան եւ
կենսունակ լինելիության եւ սերունդների` ազգային-պետական
իրավունքների հաշվին:
Հաստատակամ այս սկզբունքներին` մենք անընդունելի եւ
դատապարտելի ենք համարում Հայաստանի Արտաքին գործերի նախարարության
կողմից Թուրքիայի հետ ապրիլի 22-ի հայտարարության ստորագրումը:
Մենք գտնում ենք, որ հայ ժողովրդի մեծագույն ողբերգության
հիշատակի օրվա` ապրիլի 24-ի, անմիջական նախօրեին եւ Թուրքիայի
ղեկավարների վերջին շրջանում կատարած` Արցախյան հիմնախնդրի եւ
ընդհանրապես բացահայտ հակահայկական, հայտարարությունների ու
նախապայմաններ թելադրելու պայմաններում, այդ փաստաթղթի ի հայտ գալը
հարվածում է Հայաստանի ու հայ ժողովրդի շահերին:
Արձանագրելով, որ այս ընթացքը ենթադրում է բացասական առումով
Հայաստանի արտաքին քաղաքական ուղեգծի փոփոխություն, Հայ
Յեղափոխական Դաշնակցությունը կոալիցիային իր մասնակցության
նպատակահարմարության հարցը կքննարկի առաջիկա օրերին»: