ԱՄՆ-ի Կոնգրեսում Հայոց ցեղասպանության վերաբերյալ բանաձեւին
արդեն իր աջակցությունն է հայտնել 101 կոնգրեսական
23-04-2009 18:00:00 | Հայաստան | Քաղաքական
ԵՐԵՎԱՆ, 23 ԱՊՐԻԼԻ, ՆՈՅՅԱՆ ՏԱՊԱՆ: ԱՄՆ-ի Կոնգրեսում Հայոց
ցեղասպանության վերաբերյալ բանաձեւին արդեն իր աջակցությունն է
հայտնել 101 կոնգրեսական: Այս մասին ապրիլի 23-ի ասուլիսում
հայտնեց Ամերիկայի Հայկական համագումարի հայաստանյան գրասենյակի
տնօրեն Արփի Վարդանյանը: Նա ակնկալում է, որ ԱՄՆ-ի նախագահ Բարաք
Օբաման կկատարի իր նախընտրական խոստումը եւ ապրիլի 24-ի ուղերձում
կարտասանի «ցեղասպանություն» բառը:
Ըստ Ա.Վարդանյանի, Հայոց ցեղասպանության ճանաչումն անհրաժեշտ
է ոչ միայն Թուրքիայի, այլեւ ԱՄՆ-ի պատմության վերականգնման համար.
«Ես ուզում եմ, որ ԱՄՆ-ն ճանաչի իր սեփական պատմությունը`
ընդունելով, որ այդ տարիներին մեծ օգնություն է ցուցաբերել
ցեղասպանություն վերապրածներին»:
Ա.Վարդանյանը նշեց, որ իրենք կողմ են Հայաստանի եւ Թուրքիայի
միջեւ հարաբերությունների հաստատմանը եւ սահմանի բացմանը: Նա
Հայաստանի եւ Թուրքիայի արտգործնախարարների համատեղ
հայտարարությունը ողջունելի քայլ համարեց, միաժամանակ ձեռնպահ
մնալով այդ հայտարարության մեջ արծարծված «Ճանապարհային քարտեզի»
մասին որեւէ կարծիք հայտնելուց` մանրամասներին տեղյակ չլինելու
պատճառով: