ԵԽԽՎ-ի ապրիլի 27-30-ի նստաշրջանի օրակարգի նախնական
տարբերակում Հայաստանի հարցը ընգրկված չէ
21-04-2009 19:55:00 | Հայաստան | Քաղաքական
ԵՐԵՎԱՆ, 21 ԱՊՐԻԼԻ, ՆՈՅՅԱՆ ՏԱՊԱՆ: Եվրոպայի խորհրդի
Խորհրդարանական վեհաժողովի ապրիլի 27-30-ին Ստրասբուրգում
գումարվելիք գարնանային նստաշրջանի օրակարգի նախագծի նախնական
տարբերակում ընգրկված չէ Հայաստանի ժողովրդավարական ինստիտուտների
գործունեության վերաբերյալ Վեհաժողովի ընդունած բանաձեւերի
կատարման ընթացքի մասին հարցը: ԵԽԽՎ-ի Մոնիտորինգի հանձնաժողովի
մարտի 30-ի նիստում որոշվել է` Հայաստանի Քրեական օրենսգրքի
բարեփոխված հոդվածների կիրառման հետագա ընթացքում արձանագրվելիք
արդյունքներից կախված, մինչեւ Վեհաժողովի նստաշրջանը,
հանձնաժողովում կրկին անդրադառնալ Հայաստանի կողմից
պարտավորությունների կատարմանը:
Ինչպես «ՆՈՅՅԱՆ ՏԱՊԱՆ»-ի թղթակցին հայտնեցին ԵԽԽՎ-ում
հայկական պատվիրակությունից, Մոնիտորինգի հանձնաժողովում հարցի
քննարկումը նախատեսված է ապրիլի 27-ին:
Ըստ ԵԽ-ի մամուլի ծառայության հաղորդագրության, նստաշրջանում
հրատապ ընթացակարգով առաջարկվել է քննարկել երկու հարց: Առաջինը
ներկայացվել է Սոցիալիստների խմբի կողմից եւ վերաբերում է
Մոլդովայում ժողովրդավարական ինստիտուտների գործունեությանը, իսկ
երկրորդը` Նախարաների կոմիտեի կողմից եւ ակնկալվում է ստանալ
կարծիք` Մարդու իրավունքների եվրոպական կոնվենցիայի 14-րդ
արձանագրության վերաբերյալ, որը նպատակաուղղված է Մարդու
իրավունքների եվրոպական դատարանի ներքին ընթացակարգերի պարզեցմանը:
Օրակարգային հարցերի թվում են նաեւ ռուս-վրացական պատերազմի
հումանիտար հետեւանքները եւ երկու երկրների կողմից թիվ 1647
բանաձեւի պահանջների կատարումը, ինչպես նաեւ ԵԽ-ի մարդու
իրավունքների հանձնակատար Թոմաս Համմարբերգի 2008թ.-ի
գործունեության տարեկան զեկույցը:
Նշենք նաեւ, որ նստաշրջանի առաջին օրը նախատեսված է ԵԽ-ի
60-ամյակին նվիրված արարողություն: