Հայ-թուրքական հարաբերությունները կախված չեն ո'չ Հայաստանից,
ո'չ էլ Թուրքիայից,- գտնում է թուրքագետ Արտակ Շաքարյանը
02-04-2009 15:16:00 | Հայաստան | Քաղաքական
ԵՐԵՎԱՆ, 2 ԱՊՐԻԼԻ, ՆՈՅՅԱՆ ՏԱՊԱՆ: Հայ-թուրքական
հարաբերությունները կախված չեն ո'չ Հայաստանից, ո'չ էլ Թուրքիայից.
դրանք պայմանավորված են ավելի գլոբալ դիվանագիտական խաղով: Նման
կարծիք հայտնեց ապրիլի 2-ի ասուլիսում թուրքագետ Արտակ Շաքարյանը,
հավելելով, որ ներկայումս հայ-թուրքական հարաբերությունները գնում
են դեպի ջերմացման, քանի որ դա ձեռնտու է եւ' ԱՄՆ-ին, եւ'
Ռուսաստանին:
Ա.Շաքարյանի կարծիքով, ԱՄՆ-ի նախագահ Բարաք Օբաման ապրիլի
24-ի հետ կապված ելույթում չի արտասանի «ցեղասպանություն» բառը,
սակայն փոխարենը կհասնի որոշ մեղմացումների հայ-թուրքական
հարաբերություններում: Թուրքագետը առաջիկայում այնքան էլ հավանական
չի համարում հայ-թուրքական սահմանի լիարժեք բացումը: Ա.Շաքարյանի
խոսքերով, Թուրքիան Հայաստանի հետ հարաբերություններում միշտ անում
այնպիսի քայլեր, «որոնք կարող է հեշտությամբ ետ վերցնել, սակայն
Հայաստանից փոխարենը պահանջում է այնպիսի զիջումներ, որոնցից դժվար
է ետ դառնալ»: «Դատելով Թուքիայի դիվանագիտության ողջ
պատմությունից, մինչեւ վերջինս հստակ չստանա ապրիլի 24-ի
հաղթանակը, առաջին քայլը չի անի»,- ասաց Ա.Շաքարյանը:
Անդրադառնալով վերջերս Թուրքիայում անցկացված ՏԻՄ
ընտրություններին, նա նշեց, որ դրանք կանխորոշում են 2011թ.-ի
խորհրդարանական ընտրությունների արդյունքները: Ըստ Ա.Շաքարյանի,
այդ ընտրությունները ցույց տվեցին, որ Էրդողանի գլխավորած
«Արդարություն եւ զարգացում» կուսակցությունը լուրջ խնդիրներ ունի,
ինչը հիմնականում կապված է տնտեսական ճգնաժամի հետ: Նրա խոսքերով,
թուրքերը ցույց տվեցին, որ ճգնաժամի պայմաններում «ոչ լավ
քաղաքականություն վարելու մեջ մեղադրում են Էրդողանին եւ իր
կուսակցությանը»: