ԵՐԵՎԱՆ, 31 ՄԱՐՏԻ, ՆՈՅՅԱՆ ՏԱՊԱՆ: Որեւէ ընտրությունների ժամանակ ՀՀԿ-ն իր ակտիվիստներին եւ համախորհներին քաղաքացիների անձնագրեր հավաքելու կամ այլ ընտրախախտումներ կատարելու հանձնարարություն չի տվել եւ այս անգամ էլ չի տալու: Մարտի 31-ի ասուլիսում նման հայտարարությամբ հանդես եկավ Հայաստանի Ազգային Ժողովի «ՀՀԿ» խմբակցության անդամ Հերմինե Նաղդալյանը: Նրա համոզմամբ, սեփական նախաձեռնությամբ նման գործողությունների դիմելու դեպքում հանրապետականները պետք է պատժվեն կուսակցության կողմից: Հանրապետական պատգամավորի խոսքերով, Երեւանի ավագանու ընտրություններում բոլոր քաղաքական ուժերը պետք է համախմբված պայքարեն ընտրակեղծիքների դեմ: Ըստ նրա, այս հարցում ՀՀԿ-ն չափազանց շահագրգիռ է: Հ.Նաղդալյանը հայտարարեց, որ հանրապետականը չի պատրաստվում քաղաքականացնել ընտրությունները կամ քաղաքական նպատակներով օգտագործել իր լծակները կրթական, առողջապահական եւ այլ համակարգերում:

---