Ըստ Շեվքեթ Շայդուլինի, Հայաստանի երկաթուղու վիճակը բավարար
է
25-02-2009 21:00:00 | Հայաստան | Տնտեսություն
ԵՐԵՎԱՆ, 25 ՓԵՏՐՎԱՐԻ, ՆՈՅՅԱՆ ՏԱՊԱՆ: Այսօրվա դրությամբ
Հայաստանի երկաթուղու վիճակը գնահատվում է բավարար: Այս մասին
փետրվարի 25-ի ասուլիսում հայտարարել է «Հարավկովկասյան
երկաթուղիներ» ընկերության տնօրեն Շեվքեթ Շայդուլինը: Ըստ նրա,
«Հարավկովկասյան երկաթուղին» այսօր համարվում է խոշորագույն
ընկերություններից մեկը: Մրցակցային պայմաններում աշխատող
ընկերությանը բաժին է ընկնում Հայաստանում տրանսպորտային
փոխադրումների 29%-ը: Շ.Շայդուլինի խոսքերով, ընկերությունը այսօր
աշխատում է փոխադրման պայմանների եւ որակի բարձրացման ուղղությամբ,
նպատակ ունի վերանորոգել հին երկաթգծերը:
«Հարավկովկասյան երկաթուղիներ»-ի տնօրենը հայտնեց, որ
2009թ.-ին սակագների բարձրացում չի նախատեսվում: Ըստ նրա,
2008թ.-ին ընկերությունն աշխատել է վնասով, եւ նույն էլ
կանխատեսվում է 2009թ.-ին, ինչը պայմանավորված է ներդրումներով:
Նշվեց նաեւ, որ 2009թ.-ի հունվարին ուղեւորափոխադրումների ծավալը
կազմել է 21 հազար` 2008թ.-ի նույն ամսվա 10 հազարի դիմաց: