Հայաստան-Ուկրաինա ֆուտբոլային խաղն ավարտվել է 3:3 հաշվով
10-05-2010 17:30:00 | Հայաստան | Սպորտ
ԵՐԵՎԱՆ, 10 ՄԱՅԻՍԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Իսպանիայում
մեկնարկած «Բանկաքսայի գավաթ» ամենամյա ֆուտբոլի մրցաշարում
Հայաստանի հավաքականն առաջին իսկ պայքարում իր ուժերը չափեց
Ուկրաինայի հավաքականի հետ: Ինչպես տեղեկացնում է Իսպանիայի
«Արարատ» միության նախագահ Արարատ Ղուկասյանը, Կամսար
Հովհաննիսյանի ղեկավարած թիմը համառ պայքառ մղեց ուկրաինացիների
դեմ եւ արդեն երկրորդ խաղակեսի 15-րդ րոպեին 3:0 հաշվով հաղթում էր
հակառակորդին: Իսպանիայում հայկական ֆուտբոլի առաջին գոլի հեղինակը
Մովսես Ղազարյանն է, որը գլխի գեղեցիկ հարվածով բացեց խաղի հաշիվը:
Նա Հայաստանի թիմի օգտին գրանցեց նաեւ երրորդ գոլը: Իսկ երկրորդ
գոլի հեղինակն էր Մուկոչ Մանուկյանը:
Սակայն ուկրաինացիները, որոնք արդեն երրորդ տարին է, ինչ
մասնակցում են այս մրցաշարին, ամենեւին էլ չէին պատրաստվում խաղը
զիջելու: Նրանք անդադար մղվող հարձակումների արդյունքում կարողացան
հավասարեցնել խաղի հաշիվը, դարձնելով այն 3:3, որով եւ ավարտվեց
այն:
Այնուամենայնիվ 4-րդ ենթախմբում խաղացող Հայաստանի հավաքականը
1 միավորով գլխավորում է մրցաշարային աղյուսակը, քանի որ ենթախմբի
մյուս` Կոլումբիա-Ուրուգվայ խաղում նույնպես գրանցվել է ոչ-ոքի`
1-1 հաշիվը: