ՀՐԱՆՏ ԲԱԳՐԱՏՅԱՆԻ ԿԱՆԽԱՏԵՍՄԱՄԲ, ՄԻՋԱԶԳԱՅԻՆ ՖԻՆԱՆՍԱԿԱՆ
ՃԳՆԱԺԱՄԻ ՀԵՏԵՎԱՆՔՈՎ ԱՆԴՐԿՈՎԿԱՍՅԱՆ ԵՐԿՐՆԵՐԻ ՏՆՏԵՍՈՒԹՅՈՒՆՆԵՐԻ
ԱՆԿՄԱՆ ԲԱՐՁՐԱԿԵՏԸ ԿԼԻՆԻ ՁՄՌԱՆԸ
14-10-2008 21:00:00 | Հայաստան | Տնտեսություն
ԵՐԵՎԱՆ, 14 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Միջազգային ֆինանսական
ճգնաժամը կանդրադառնա Հայաստանի, Ադրբեջանի եւ Վրաստանի
տնտեսությունների վրա, եւ հնարավոր է, որ այդ պետությունների
տնտեսական վիճակի ամենախոր վատթարացումը լինի ձմռանը: Այսպիսի
կանխատեսում է արել ՀՀ նախկին վարչապետ Հրանտ Բագրատյանը
«Կովկասյան լրագրողների ցանցի» կազմակերպած օն-լայն մամլո
ասուլիսում:
Նա բացատրել է, որ Հայաստանի համար գոյություն ունեն բանկերի
իրացվելիության, արտասահմանից տրանսֆերտների նվազման, բաժնետոմսերի
թողարկման անհուսալիության, լեռնամետալուրգիական ճյուղի ճգնաժամի,
բնակարանային շինարարության կտրուկ անկման ռիսկեր: Ադրբեջանի համար
այդ համալիրին նա ավելացրել է նավթի գների նվազումը, իսկ Վրաստանի
համար` էական կորուստները բեռնափոխադրումների նվազման պատճառով:
Հ.Բագրատյանի գնահատմամբ, Հայաստանի տնտեսությունը այնքան էլ
չտուժեց Վրաստանում վերջին ռազմական գործողությունների պատճառով,
քանի որ «միացրեց խնայողության լրացուցիչ շարժիչներ եւ պահպանեց
գոյությունը»: Այդ իրադարձությունները վատ անդրադարձան Հայաստանի
էներգետիկ ապահովման վրա` Ռուսաստանի հետ հաղորդակցական կապի
ժամանակավոր դադարեցման միջոցով: Սակայն, «մեծ հաշվով, եթե
վերցնենք վերջին, ասենք, 20 տարին, Հայաստանին հաջողվում է
վերապրել: Պատահական չէ, որ Հայաստանն ունի ՀՆԱ-ի միավորի
արտադրության էներգատարողության ամենացածր ցուցանիշը, որով մենք
կարող ենք համեմատվել արեւմտաեվրոպական երկրների հետ: Մի խոսքով,
վատ է, բայց ոչ անելանելի»,- նշել է Հ.Բագրատյանը:
Նախկին վարչապետը կարծիքով, Հայաստանը կարող է կարճաժամկետ
ժամանակամիջոցով էլեկտրաէներգիա մատակարարել Վրաստանին եւ
Թուրքիային, իսկ իր էներգետիկական անվտանգության խնդիրը Հայաստանը
կլուծի հիդրոէլեկտրակայանների զարգացման եւ նոր ատոմակայանի
կառուցման միջոցով:
Մյուս կողմից, Հ.Բագրատյանը համեմատական առավելություն է
համարում Հայաստանի աշխարհագրական դիրքը, որը միակն է տարածաշրջանի
5 երկրներից, որ անմիջական իրական սահման ունի մնացած բոլոր չորսի
հետ: «Այդ պատճառով քաղաքական հարցերի լուծմանը զուգընթաց մենք
պարտավոր ենք կոմունիկացիոն ծառայություններ մատուցել մեր
հարեւաններին»,- ասել է ՀՀ նախկին վարչապետը: