ՀԱՅԱՍՏԱՆՈՒՄ ԱՌԱՋԻԿԱ 1,5 ՏԱՐՈՒՄ ԿԻՐԱԿԱՆԱՑՎԵՆ ԳՈՐԾԱՐԱՐ
ՄԻՋԱՎԱՅՐԻ ԲԱՐԵԼԱՎՄԱՆՆ ՈՒՂՂՎԱԾ ՄԻՋՈՑԱՌՈՒՄՆԵՐ
26-06-2008 19:30:00 | Հայաստան | Տնտեսություն
ԵՐԵՎԱՆ, 26 ՀՈՒՆԻՍԻ, ՆՈՅՅԱՆ ՏԱՊԱՆ: ՀՀ կառավարության հունիսի
26-ի նիստում հաստատվել է Հայաստանի գործարար միջավայրի բարելավման
միջոցառումների ծրագիրը: Ինչպես նիստից հետո լրագրողներին հայտնեց
ՀՀ էկոնոմիկայի փոխնախարար Վահրամ Ղուշչյանը, գործարար միջավայրի
բարելավման նպատակով առաջիկա 1,5 տարում կիրականացվեն մի շարք
միջոցառումներ: Նա նշեց, որ անցած տարի Համաշխարհային բանկի կողմից
187 երկրներում կատարած ուսումասիրությունների արդյունքում պարզվել
է, որ Հայաստանը մի շարք ցուցանիշներով բավականին առաջընթաց է
ապրել, իսկ որոշ ցուցանիշներով` ետընթաց: Ընդհանուր առմամբ նշված
երկրների ցանկում, գործարար միջավայրի բարելավման առումով
Հայաստանը գտնվում է 39-րդ տեղում, իսկ Վրաստանը` 17:
Վ.Ղուշչյանը տեղեկացրեց, որ ըստ ՀԲ-ի ուսումնասիրության,
սեփականության գրանցման գործընթացի կարճ տեւողության ցուցանիշով
Հայաստանը գտնվում է 2-րդ տեղում, իսկ ընկերությունների
հիմնադրման` 47-րդ տեղում: Ըստ փոխնախարարի, մինչեւ 2010թ.-ը
Հայաստանը կարող է հայտնվել այդ ցանկի 3-րդ տեղում: Նշվեց, որ
վարկեր ստանալը նույնպես խնդիր է, եւ այդ ցուցանիշով 36-րդ տեղից
կտեղափոխվի 13-րդ տեղը: Ներդրումների պաշտպանվածության ցուանիշով,
ըստ ՀԲ-ի, Հայաստանը հայտնվել է 83-րդ տեղում, իսկ հարկերի
վճարման` 143-րդ: