ԵՐԵՎԱՆ, 8 ՄԱՅԻՍԻ, ՆՈՅՅԱՆ ՏԱՊԱՆ: Շահույթ չհետապնդող
հայաստանյան վեց հասարակական կազմակերպություններ քաղաքացիական
ներգրավվածության խթանմանն ուղղված ծրագրերի իրականացման համար
Համաշխարհային բանկի եւ Բաց հասարակության ինստիտուտի
օժանդակության հիմնադրամի կողմից կստանան դրամաշնորհներ: Այս մասին
«ՆՈՅՅԱՆ ՏԱՊԱՆ»-ի թղթակցին հայտնեցին ՀԲ-ի Երեւանի գրասենյակից:
«Մենք պլյուս» կազմակերպությանը դրամաշնորհ կտրվի տարեվերջին
Գյումրիում անցկացվելիք տեղական ինքնակառավարման մարմինների
ընտրություններին քվեարկողների իրազեկվածության պատշաճ մակարդակն
ապահովելու նպատակով:
Հայ-ֆրանսիական զարգացման հիմնադրամը ստացած դրամաշնորհով
կօժանդակի լսողության խանգարումներ ունեցողների հատուկ դպրոցների
շրջանավարտների սոցիալական ինտեգրմանը, իսկ Կայուն ջրային
միջավայրի բնապահպանական-գիտական ՀԿ-ն` կխթանի բնապահպանական
խնդիրներում երիտասարդության քաղաքացիական մասնակցությունը,
մասնավորապես կօժանդակի Վանաձորի եւ Դիլիջանի բուհական
ուսանողությանը բնապահպանական ոլորտում գիտելիքների ձեռքբերման
հարցում:
«Կրթության ասպարեզ» ՀԿ-ն կուսումնասիրի Շիրակի մարզի
միջնակարգ դպրոցների խնդիրները, իսկ «ՍԿԱՐՓ» Առողջարարական կենտրոն
ՀԿ-ն կխթանի շարժունակության խնդիրներ ունեցող հաշմանդամ
երիտասարդների սոցիալական ինտեգրմանը:
«Փաստաբանները մարդու իրավունքների համար» կազմակերպությանը
դրամաշնորհը տրվել է տեղական ինքնակառավարման մարմինների (ՏԻՄ)
գործունեության վերաբերյալ գյուղական բնակչության իրազեկվածության
մակարդակը բարձրացնելու նպատակով:
Նշենք, որ վերջին 10 տարիներին 53 տեղական ՀԿ-եր ստացել են
ընդհանուր առմամբ 491 հազար ԱՄՆ դոլարի դրամաշնորհներ: