2007 Թ.-ԻՆ ՀԱՅԱՍՏԱՆ ԱՅՑԵԼԱԾ ԶԲՈՍԱՇՐՋԻԿՆԵՐԻ ԹԻՎՆ ԱՃԵԼ Է
33,5%-ՈՎ, ԻՍԿ ՀԱՅԱՍՏԱՆԻՑ ՄԵԿՆԱԾՆԵՐԻՆԸ` 38,7%-ՈՎ
20-03-2008 17:31:00 | Հայաստան | Տնտեսություն
ԵՐԵՎԱՆ, 20 ՄԱՐՏԻ, ՆՈՅՅԱՆ ՏԱՊԱՆ: 2007թ.-ին Հայաստան են
այցելել 510 հազար 287 զբոսաշրջիկներ` 2006թ.-ի 382 հազար 240
զբոսաշրջիկների դիմաց (աճը կազմել է 33,5%): ՀՀ Ազգային
վիճակագրական ծառայության տվյալներով, նույն ժամանակահատվածում
զբոսաշրջության նպատակով հանրապետությունից մեկնել է 467 հազար 574
մարդ, կամ 2006թ.-ի համեմատ 38,7%-ով ավելի: Զբոսաշրջային
կազմակերպությունների միջոցով հանրապետությունից մեկնածների թիվը
2006թ.-ի 8 418-ից նախորդ տարի հասել է 11 377-ի:
2007թ.-ին միջազգային զբոսաշրջիկների ընդունել են 47
հյուրանոցներ` նախորդ տարվա 40-ի դիմաց: Հյուրանոցներում եւ
հյուրանոցային հանգրվաններում 2007թ.-ին իջեւանել են 58 876
զբոսաշրջիկներ` նախորդ տարվա 54 474-ի դիմաց:
ԱՊՀ երկրներից Հայաստան այցելած եւ հյուրանոցներում ու
հյուրանոցային հանգրվաններում հաշվառված զբոսաշրջիկների բաժինն
ընդհանուրի մեջ 2006թ.-ի 23,9%-ի դիմաց 2007թ.-ին կազմել է 24,8%:
Իսկ նրանց բացարձակ թվաքանակը աճել է 12,3%-ով. այդ թվում,
Ռուսաստանից ժամանածների բաժինը 4,3%-ից աճել է մինչեւ 18,3%-ի,
իսկ բացարձակ թվաքանակը` 362%-ով, Վրաստանից ժամանածներինը`
17,6%-ից նվազել է մինչեւ 4,4%, իսկ բացարձակ թվաքանակը նվազել է
72,8%-ով: ԱՊՀ այլ երկրներից ժամանածների բաժինն ընդհանուրի մեջ
2006թ.-ի 2%-ից 2007թ.-ին հասել է 2,1%-ի, իսկ ժամանածների
բացարձակ թվաքանակն աճել է 15,1%-ով:
Եվրոմիության երկրներից 2007թ.-ին Հայաստան այցելածների
բաժինն ընդհանուրի մեջ կազմել է 37,1%` նախորդ տարվա 35,5%-ի
դիմաց, իսկ բացարձակ թվաքանակն աճել է 12,7%-ով: Այլ երկրներից
2007թ.-ին Հայաստան այցելածների բաժինն ընդհանուրի մեջ կազմել է
38,1%` նախորդ տարվա 40,6%-ի դիմաց, իսկ բացարձակ թվաքանակն աճել է
1,5%-ով: Մասնավորապես, ԱՄՆ-ից 2007թ.-ին Հայաստան այցելածների
բաժինն ընդհանուրի մեջ կազմել է 21%` նախորդ տարվա 21,6%-ի դիմաց,
իսկ բացարձակ թվաքանակն աճել է 5,2%-ով:
2007թ.-ին հյուրանոցներում եւ հյուրանոցային հանգրվաններում
իջեւանած 58 876 զբոսաշրջիկներից 37,5%-ը կամ 22 084-ը (նախորդ
տարվա 18 493-ի դիմաց) Հայաստան են այցելել գործնական, 20%-ը կամ
11 753-ը (13 499)` հանգստի եւ ժամանցի, մնացածը` այլ նպատակներով:
Զբոսաշրջային ընկերությունների կազմակերպած
ուղեւորություններով Հայաստանից արտասահման մեկնած 11 377
զբոսաշրջիկների 6,4%-ը կամ 3 773-ը (733) մեկնել են գործնական,
5,5%-ը կամ 3 209-ը (1 655)` հանգստի եւ ժամանցի, մնացածը` այլ
նպատակներով: