ՄԻԼԱՆՈՒՄ ՎԱԽՃԱՆՎԵԼ Է ԻՏԱԼԱԿԱՆ ԺՈՒՌՆԱԼԻՍՏԻԿԱՅԻ ՆԱՀԱՊԵՏ ԷՆՑՈ
ԲԻԱՋԻՆ
06-11-2007 19:50:00 | Իտալիա | Միջազգային
ՄԻԼԱՆ, 6 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 6-ին առավոտյան
Միլանի կլինիկաներից մեկում կյանքի 88-րդ տարում վախճանվել է
իտալական ժուռնալիստիկայի նահապետ Էնցո Բիաջին, հաղորդում է
«Նովոստի» գործակալությունը:
Նա մամուլում սկսել է աշխատել, երբ 18 տարեկան պատանի էր,
պրոֆեսիոնալ լրագրող է դարձել Երկրորդ համաշխարհային պատերազմի
սկզբին, իսկ 1943 թվականի սեպտեմբերին որոշում է միանալ
հակաֆաշիստ-պարտիզաններին: 1945 թվականի ապրիլին Բիաջին դաշնակից
զորքերի հետ միասին մտնում է Բոլոնիա եւ ավելի ուշ ռադիոյով
հայտարարում պատերազմի ավարտը:
Իր երկար կյանքի ընթացքում Բիաջին հասցրել է աշխատել Իտալիայի
բոլոր առաջատար օրաթերթերում, բայց մեծ համբավի է արժանանում որպես
ՌԱԻ ազգային հեռուստատեսության լրագրող, որտեղ նա սկսում է աշխատել
դեռ 1950-ականներին: Նա եղել է իտալական հեռուստատեսության
նորությունների ծառայության տնօրենը, բազմաթիվ սիրված հեղինակային
հեռուստածրագրեր վարել: Սկսած 1991 թվականից, Բիաջին քսան տարի
շարունակ ամեն տարի նոր ծրագիր էր պատրաստում, որն ամեն օր եթեր էր
հեռարձակվում ՌԱԻ առաջին ալիքով փրայմ-թայմ: