ՔԱԲՈՒԼ, 6 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Աֆղանստանի հյուսիսում տեղի ունեցած ահաբեկչական գործողության հետեւանքով զոհվել է 90 եւ վիրավորվել մոտ 50 մարդ: Մահապարտ ահաբեկիչը Բաղլան նահանգի շաքարի գործարանում գործողությունն իրականացրել է այն ժամանակ, երբ ձեռնարկություն էր այցելել խորհրդարանականների պատվիրակությունը: Գրոհի զոհ են դարձել Ազգային վեհաժողովի հինգ անդամներ, այդ թվում Հյուսիսային դաշինքի ազդեցիկ ներկայացուցիչներից մեկը` խորհրդարանական ընդդիմության խոսնակ Մուստաֆա Կազեմին: Տեղի ունեցած ահաբեկչական գործողությունը խոշորագույնն է Աֆղանստանում 2001 թվականի հոկտեմբերին արեւմտյան զորքերի ռազմական գործողությունների սկսման պահից ի վեր: Նշվում է նաեւ, որ գործողության պատասխանատվությունը որեւէ կազմակերպություն առայժմ չի ստանձնել:

---