ՀԱՄԱՀԱՅԿԱԿԱՆ ԵՐԻՏԱՍԱՐԴԱԿԱՆ ՄԻՋԱԶԳԱՅԻՆ ԽՈՐՀՐԴԱԺՈՂՈՎՆ ԱՆՑԵԼ Է
ԲԱՐՁՐ ՄԱԿԱՐԴԱԿՈՎ,- ԱՍՈՒՄ Է ՎԼԱԴԻՄԻՐ ԱՂԱՅԱՆԸ
25-07-2007 19:00:00 | Հայաստան | Հասարակություն
ԵՐԵՎԱՆ, 25 ՀՈՒԼԻՍԻ, ՆՈՅՅԱՆ ՏԱՊԱՆ: Համաշխարհային հայկական
կոնգրեսի նախաձեռնությամբ հուլիսի 9-11-ին Երեւանում կազմակերպված
Համահայկական երիտասարդական միջազգային խորհրդաժողովից հետո
արտերկրից ստացված արձագանքները վկայում են, որ միջոցառումն
անցկացվել է բարձր մակարդակով: Այս մասին հուլիսի 25-ի ասուլիսում
հայտնեց Կոնգրեսի հայաստանյան մասնաճյուղի ղեկավար Վլադիմիր
Աղայանը: Նրա խոսքերով, խորհրդաժողովի աշխատանքները անցել են
կառուցողական մթնոլորտում: Նշվեց, որ 25 երկրներից ժամանած 250
երկտասարդները բաժանվել էին հինգ աշխատանքային խմբերի:
Վ.Աղայանի դիտարկմամբ, բոլոր պատվիրակությունների
ներկայացուցիչները ձգտում էին զգացմունքային ոլորտից տեղափոխվել
գործնական քայլերի դաշտ: Որպես օրինակ նա նշեց, որ բացի հայրենիքի
հանդեպ կարոտից, Սփյուռքի երիտասարդները խոսում էին
հայրենադարձության անհրաժեշտության մասին` շեշտելով, որ այդ
համատեքստում կարեւոր է Հայաստանում նոր աշխատատեղերի ստեղծումը:
Նա նշեց, որ Կոնգրեսը մեծ նշանակություն է տալիս
երիտասարդների հետ տարվող աշխատանքներին, քանզի համազգային
խնդիրների լուծման գործում առանձնահատուկ դեր ունի թե Հայաստանի,
թե Սփյուռքի ողջ հայ երիտասարդությունը: