ՏԵՂԻ ՈՒՆԵՑԱՎ ԲՈՂՈՔԻ ԱԿՑԻԱ` Ի ՊԱՇՏՊԱՆՈՒԹՅՈՒՆ «ԱԶԱՏՈՒԹՅՈՒՆ»
ՌԱԴԻՈԿԱՅԱՆԻ
02-07-2007 19:00:00 | Հայաստան | Հասարակություն
ԵՐԵՎԱՆ, 2 ՀՈՒԼԻՍԻ, ՆՈՅՅԱՆ ՏԱՊԱՆ: «Թրանսփարենսի ինթերնեյշնլ»
միջագային կազմակերպության հայաստանյան գրասենյակը, Հայաստանի
Հելսինկյան կոմիտեն եւ մի շարք այլ հասարակական
կազմակերպություններ հուլիսի 2-ին կազմակերպել էին բողոքի երթ`
ընդդեմ «Հեռուստատեսության եւ ռադիոյի մասին» օրենքում ՀՀ
կառավարության առաջարկվող փոփոխության, որն, ըստ ցույցի
մասնակիցների, միանշանակ միտված է «Ազատություն» ռադիոկայանի
հեռարձակման դեմ:
Հիշեցնենք, որ հունիսի 29-ին ԱԺ-ում առաջին ընթերցմամբ
ընդունված օրինագծով նախատեսվում է «միանշանակ արգելել Հանրային
հեռուստառադիոընկերության հաճախություններով այլ հեռարձակվող
կազմակերպությունների գործունեությունը»:
ՀՀ կառավարության շենքից դեպի ՀՀ Ազգային Ժողով երթի
մասնակիցները քայլում էին բերանները սպիտակ ժապավեններով փակած:
Ցուցարարները ԱԺ-ի շենքի մոտ տեղադրեցին «Փակել Ազատությունը. քեզ
համար, Հայաստան», «1937-2007», «Ամոթ ֆեոդալական կլանին եւ դրա
մանկլավիկներին» բավանդակությամբ պաստառներ:
Ինչպես «ՆՈՅՅԱՆ ՏԱՊԱՆ»-ի թղթակցին հայտնեց «Թրանսփարենսի
ինթերնեյշնլ»-ի հայաստանյան գրասենյակի նախագահ Ամալյա Կոստանյանը,
երթի նպատակը ԱԺ պատգամավորների կողմից երկրորդ ընթերցմամբ
օրինագծի ընդունումը կանխելն է: «Մենք չենք կասկածում, որ այդ
օրենքը կընդունվի, քանի որ մեր երկրում կամայականություն է
տիրում,- միաժամանակ նշեց նա: