ԱՇԽԱՐՀԻ ԵԶԴԻՆԵՐԻ ԱՌԱՋՆՈՐԴԸ ԽՆԴՐՈՒՄ Է ԱՄՆ ՆԱԽԱԳԱՀԻՑ`
ԱՊԱՀՈՎԵԼ ԻՐԱՔԻ ՀՅՈՒՍԻՍՈՒՄ ԲՆԱԿՎՈՂ ԵԶԴԻՆԵՐԻ ԱՆՎՏԱՆԳՈՒԹՅՈՒՆԸ
19-06-2007 20:00:00 | Հայաստան | Հասարակություն
ԵՐԵՎԱՆ, 19 ՀՈՒՆԻՍԻ, ՆՈՅՅԱՆ ՏԱՊԱՆ: Աշխարհի եզդիների ազգային
միության նախագահ Ազիզ Թամոյանը նամակ է հղել ԱՄՆ նախագահ Ջորջ
Բուշին` Իրաքի հյուսիային մասում բնակվող եզդիների անվտանգությունն
ապահովելու խնդրանքով: Հունիսի 19-ի ասուլիսում նա նշեց, որ քրդերի
«ազգային-ազատագրական շարժումը» ճնշելու նպատակով թուրքական բանակը
մտնում է Իրաքի հյուսիային մասը, որտեղ ապրում են նաեւ 1,2 մլն
եզդիներ: Ըստ Ա.Թամոյանի, այնտեղ բնակվող եզդիները ենթարկվում են
նաեւ տեղի մուսուլմանների հալածանքներին:
«Մեր բնօրրանը Իրաքի հյուսիսային մասն է, որտեղ եզդիները
ապրում են 5 հազար տարուց ավելի»,- ասաց Ա.Թամոյանը: Սակայն, նրա
խոսքերով, վերջին երկու ամիսների ընթացքում այնտեղ եզդիների վիճակը
կտրուկ վատթարացավ. երկու ամիս առաջ մուսուլմանները մի օրում 24
հոգու գնդակահարեցին միայն եզդի լինելու պատճառով: Եվ եզդիների
նկատմամբ այդ ահաբեկությունը մինչ օրս շարունակվում է:
Ջ.Բուշին ուղղված նամակում, մասնավորապես, ասվում է. «Իրաքը
կարող է մասնատվել` ստեղծելով շիաների, սուննիների եւ քրդական
պետություններ»: Ա.Թամոյանը կարծում է, որ այս երեք պետությունների
կողքին անպայման պետք է ստեղծվի նաեւ Եզդիստան պետությունը: «Մեր
խնդրանքն է, որ այդ տարածքը համարվի ԱՄՆ-ի վարչական մաս: Մենք
ուզում ենք, որ ԱՄՆ-ն լուծի մեր հարցերը` որպես աշխարհի հզոր
պետություն: Մենք անպաշտպան ժողովուրդ ենք Իրաքում: Այսօր եզդի
ժողովրդի բախտը կախված է միմիայն ԱՄՆ-ից, որովհետեւ իրենց զորքը
արդեն Իրաքում է»,- ասաց Աշխարհի եզդիների ազգային միության
առաջնորդը` ավելացնելով, որ ամերիկյան զորքը ուղղակի պետք է թույլ
չտա թուրքերին` վնասել Հյուսիսային Իրաքում բնակվող եզդիներին: