ՀԲ-ի կողմից Հայաստանում իրականացվող ծրագրերը կօգնեն
հաղթահարելու համաշխարհային ֆինանսատնտեսական ճգնաժամի բացասական
հետեւանքները
24-03-2009 21:26:00 | Հայաստան | Տնտեսություն
ԵՐԵՎԱՆ, 24 ՄԱՐՏԻ, ՆՈՅՅԱՆ ՏԱՊԱՆ: Հայաստանի վարչապետ Տիգրան
Սարգսյանի եւ Համաշխարհային բանկի` հոլանդական խմբում նաեւ
Հայաստանը ներկայացնող, գործադիր տնօրեն Ռուդոլֆ Յան Թրեֆերսի
մարտի 24-ի հանդիպմանը քննարկվել են ներկայիս համաշխարհային
ֆինանսական եւ տնտեսական ճգնաժամի պայմաններում ՀԲ-ի հետ Հայաստանի
հետագա համագործակցության հնարավորություններն ու հեռանկարները:
Ինչպես «ՆՈՅՅԱՆ ՏԱՊԱՆ»-ին հայտնեցին ՀՀ կառավարության
Տեղեկատվության եւ հասարակայնության հետ կապերի վարչությունից,
Տ.Սարգսյանը հույս է հայտնել, որ այսուհետ եւս ՀԲ-ի կողմից
իրականացվող ծրագրերը, որոնք հիմնականում ուղղվելու են փոքր եւ
միջին ձեռնարկատիրության զարգացմանը, սոցիալական հիմնախնդիրների
լուծմանը, կօգնեն հաղթահարելու համաշխարհային ֆինանսատնտեսական
ճգնաժամի բացասական հետեւանքները: Վարչապետն ընդգծել է, որ
ճգնաժամը մի կողմից նաեւ նոր հնարավորություններ է ստեղծում, որից
պետք է օգտվել` ավելի եռանդուն իրականացնելու բարեփոխումները,
հավաքագրելու ներքին կարողությունները, բացահայտելու մրցունակ
ոլորտները: Ըստ նրա, Հայաստանում տեխնոլոգիաների,
գյուղատնտեսության, քիմիական, հանքահումքային եւ այլ ոլորտներում
աճի որոշակի ներուժ կա, որը նաեւ ՀԲ-ի աջակցությամբ հնարավոր է
արդյունավետորեն զարգացնել: