Որոշ առեւտրի կետերի տվյալները ուղարկվել են Պետական
եկամուտների կոմիտե
09-03-2009 17:30:00 | Հայաստան | Տնտեսություն
ԵՐԵՎԱՆ, 9 ՄԱՐՏԻ, ՆՈՅՅԱՆ ՏԱՊԱՆ: Հայաստանի Տնտեսական
մրցակցության պաշտպանության պետական հանձնաժողովը մարտի 9-ին
Պետական եկամուտների կոմիտե է ուղարկել առեւտրի այն կետերի
տվյալները, որտեղ մարտի 3-6-ի` դոլարի փոխարժեքի տատանման
պատրվակով արձանագրվել է առաջին անհրաժեշտության մի քանի
ապրանքատեսակների գների աճ: Ցանկն ուղարկվել է Պետեկամուտների
կոմիտե` նշյալ առեւտրի կետերում ստուգումներ իրականացնելիս
ապրանքների բարձր գներով իրացման հանգամանքը հաշվի առնելու
նպատակով:
Ինչպես նշված է հանձնաժողովի մամլո հաղորդագրությունում,
համաձայն մարզերից ստացված տվյալների, մարզերում շաքարավազը,
կարագը, ձեթը, բրինձը եւ ալյուրը իրացվում են ավելի բարձր գներով,
քան Երեւանում: Պետեկամուտների կոմիտեի ստուգումները կընդգրկեն
նաեւ մարզերի տնտեսվարողներին:
Միաժամանակ նշվում է, որ ալյուրի շուկայում գործող տնտեսվարող
սուբյեկտներն իջեցրել են ալյուրի մատակարարման գները` մինչեւ
թանկացումը եղած մակարդակին. առաջին կարգի ալյուրի 50 կիլոգրամանոց
մեկ պարկն արժե 7,8 հազար դրամ, բարձր կարգինը` 8820 դրամ:
Շաքարավազը մանրածախ ցանցերին իրացվում է 245 դրամով (բարձրացվել
էր մինչեւ 270 դրամի):
Դեղերի, կենցաղային տեխնիկայի, ձեթի եւ կարագի շուկաներում
վարույթներն ընթացքի մեջ են, իսկ մյուս շուկաներում մոնիտորինգը
շարունակվում է: