Առաջիկա մի քանի ամսվա ընթացքում Հայաստանում կսկսվի առաջին
արեւային էլեկտրակայանի կառուցումը
27-02-2009 23:40:00 | Հայաստան | Տնտեսություն
ԵՐԵՎԱՆ, 27 ՓԵՏՐՎԱՐԻ, ՆՈՅՅԱՆ ՏԱՊԱՆ: Հայկական «Վիասֆեր
Տեխնոպարկ»-ում գործող «Տրանզիստոր Պլյուս» ընկերությունը
նախատեսում է առաջիկա մի քանի ամսվա ընթացքում սկսել Հայաստանում
առաջին արեւային էլեկտրակայանի կառուցումը: Այն կունենա 100
կիլովատ հզորություն: Այս մասին փետրվարի 27-ին հայտնեց
ընկերության տնօրեն Գագիկ Այվազյանը` կլիմայի փոփոխությանը եւ
ածխածնային արտանետումների ցածր մակարդակ ապահովող տեխնոլոգիաներին
նվիրված սեմինարի ժամանակ:
Նրա խոսքերով, տեխնիկական եւ բիզնես հիմնավորում ունեցող, ՀՀ
Էներգետիկայի նախարարության հավանությանն արժանացած նախագիծն
իրականացվելու է մի շարք կազմակերպությունների հետ համատեղ: Ըստ
Գ.Այվազյանի, «Տրանզիստոր Պլյուս»-ի արեւային համակարգերի
մշակումներրի համար տրվել են 4 միջազգային արտոնագրեր:
Անդրադառնալով էլեկտրակայանի կառուցման համար կիրառվելիք
նորարարություններին` Գ.Այվազյանը նշեց, որ օգտագործվելու են արեւի
էներգիայի կուտակման ոչ թե սիլիցիումային, այլ եռաշերտ
հետերոէլեմենտներ: Վերջիններս, ի տարբերություն սիլիցիումային
էլեմենտների, կլանում են լույսի սպեկտրի համարյա ամբողջ տիրույթը
եւ ունեն ավելի բարձր` 35-39% էֆեկտիվություն: Նախատեսվում է, որ
էլեկտրակայանը կունենա հետերոէլեմենտներից կազմված 10 մոդուլ`
յուրաքանչյուրը 10 կիլովատ հզորությամբ: Մոդուլները կհագեցվեն
արեւի շարժին հետեւող համակարգերով, որոնց միջոցով մոդուլները
կընդունեն արեւի ուղղահայաց ընկնող ճառագայթները: Ուժեղ քամու
դեպքում մոդուլները կընդունեն հորիզոնական դիրք, որպեսզի նվազեցվի
քամու ճնշումը մոդուլի վրա:
Նախատեսվում է, որ «Տրանզիստոր Պլյուս»-ի արեւային
էլեկտրակայանում արտադրված 1 վատ էլեկտրաէներգիայի ինքնարժեքը փոքր
կլինի 3 դոլարից, սակայն, ըստ «Վիասֆեր Տեխնոպարկ»-ի գլխավոր
տնօրեն Արամ Վարդանյանի, կան այդ ինքնարժեքը մինչեւ 1,7 դոլարի
նվազեցնելու հնարավորություններ, որը մոտ կլինի Հայաստանի
հիդրոէլեկտրակայաններում արտադրվող էլեկտրաէնեգիայի ինքնարժեքին:
Նաեւ նշվեց, որ Հայկական ատոնակայանի կառուցվելիք էներգեբլոկի
արտադրած 1 վատ էլեկտրաէներգիայի ինքնարժեքը կազմելու է 4 դոլար:
Գ.Այվազյանը հայտնեց, որ արտերկրում սիլիցումային ֆոտովոլտայիկ
արեւային կայաններում արտադրված 1 վատ էլեկտրաէներգիայի ինքնարժեքը
ներկայումս կազմում է 5-6 դոլար:
Նրա խոսքերով, «Տրանզիստոր Պլյուս»-ի արեւային համակարգերը
տեղադրվել են հայկական «Բարվա» ընկերության 10 հակակակարկտային
կայաններում, 2006թ.-ից «Վիասֆեր Տեխնոպարկ»-ում գործում է 5
կիլովատ հզորությամբ արեւային ջրհան կայանը: