ՀՀ ԱՌՈՂՋԱՊԱՀՈՒԹՅԱՆ ՆԱԽԱՐԱՐՈՒԹՅԱՆ 2006 Թ.-Ի ԱՇԽԱՏԱՆՔԸ
ՎԱՐՉԱՊԵՏԸ ԳՆԱՀԱՏԵԼ Է «ԲԱՎԱՐԱՐ»
23-01-2007 18:00:00 | Հայաստան | Հասարակություն
ԵՐԵՎԱՆ, 23 ՀՈՒՆՎԱՐԻ, ՆՈՅՅԱՆ ՏԱՊԱՆ: 2006թ.-ին առաջին անգամ
հանրապետության ազգաբնակչության համար առաջնային
(ամբուլատոր-պոլիկլինիկական) բուժօգնության, ինչպես նաեւ 65
տարեկանից բարձր տարիքային խմբում ստոմատոլոգիական օգնության
տրամադրումն իրականացվել է պետական պատվերի շրջանակներում:
Հունվարի 22-ին վարչապետին ՀՀ Առողջապահության նախարարության
ներկայացրած հաշվետվության համաձայն, առողջապահության 39,4 մլրդ
դրամ (մոտ 107 մլն ԱՄՆ դոլար) կազմող բյուջեից 1 մլրդ դրամը
հատկացվել է համակարգի հաստատությունները նորագույն
բուժսարքավորումներով համալրմանը: Շարունակվել է ընտանեկան
բժշկության համակարգի ներդրումը:
Ըստ հաշվետվության, 2006թ.-ին հանրապետությունում
համաճարակային իրավիճակը համեմատաբար հանգիստ է եղել: Զգալի
աշխատանքներ են կատարվել տուբերկուլյոզի դեմ պայքարի
2003-2006թթ.-ի ազգային ծրագրի իրականացման, ոլորտի իրավական դաշտի
բարելավման ուղղությամբ:
Վարչապետ Անդրանիկ Մարգարյանը հանձնարարել է ուշադրություն
դարձնել հատկապես մարզային բուժական հաստատությունների զարգացմանը,
պետական պատվերի շրջանակներում դրանց առավել լայն ըդգրկմանը:
Վարչապետը նախարարության 2006թ.-ի աշխատանքը գնահատել է
«բավարար»: