ՖՐԱՆՍԻԱՅԻ ԱԳՆ ՂԵԿԱՎԱՐԸ ՀՈՒՅՍ ՈՒՆԻ, ՈՐ ՄԱՄԵԴՅԱՐՈՎ-ՕՍԿԱՆՅԱՆ
ՓԱՐԻԶՅԱՆ ՀԱՆԴԻՊՈՒՄԸ ԿՆՊԱՍՏԻ ՂԱՐԱԲԱՂՅԱՆ ՀԱԿԱՄԱՐՏՈՒԹՅԱՆ
ԿԱՐԳԱՎՈՐՄԱՆ ԱՌԱՋԸՆԹԱՑԻՆ
24-10-2006 16:20:00 | Ֆրանսիա | Միջազգային
ՓԱՐԻԶ, 24 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Ադրբեջանի նախագահ Իլհամ
Ալիեւը պաշտոնական այցով Ֆրանսիա կմեկնի 2007 թվականի հունվարին:
Այս մասին հոկտեմբերի 24-ին ԻՏԱՌ-ՏԱՍՍ-ին տեղեկացրել են Ֆրանսիայի
արտաքին քաղաքական գերատեսչությունում Ֆրանսիայի արտաքին գործերի
նախարար Ֆիլիպ Դուստ-Բլազիի եւ իր ադրբեջանցի գործընկեր Էլմար
Մամեդյարովի վարած բանակցություններից հետո:
Հանդիպման ժամանակ նշվել է, որ երկու երկրների տնտեսական
հարաբերությունները վերելք են ապրում, եւ ֆրանսիական
ձեռնարկությունները մեծ ուշադրություն են դարձնում ադրբեջանական
շուկային: Անցած տարի երկկողմ առեւտրաշրջանառությունը մեծացել է
եռակի եւ կազմել մոտ 500 մլն. եվրո:
Ֆ. Դուստ-Բլազին հույս է հայտնել, որ Փարիզում կայանալիք
Ադրբեջանի եւ Հայաստանի արտաքին գործերի նախարարների հանդիպումը
կնպաստի առաջընթացին Լեռնային Ղարաբաղի հակամարտության կարգավորման
ճանապարհին: Ֆրանսիան Ռուսաստանի եւ ԱՄՆ-ի հետ միասին ԵԱՀԿ Մինսկի
խմբի համանախագահներից մեկն է, որն իրականացնում է միջնորդություն
այդ խնդրի լուծման գործում: