ՀԱՅԱՍՏԱՆԻ ԵՐԻՏԱՍԱՐԴԱԿԱՆ ՀԱՎԱՔԱԿԱՆՆԵՐԸ ԱՇՆԱՆԸ ԿՄԱՍՆԱԿՑԵՆ
ԵՎՐՈՊԱՅԻ ԱՌԱՋՆՈՒԹՅԱՆ ՈՐԱԿԱՎՈՐՄԱՆ ԱՌԱՋԻՆ ՓՈՒԼԵՐԻ ՀԱՆԴԻՊՈՒՄՆԵՐԻՆ
08-08-2005 17:40:00 | Հայաստան | Սպորտ
ԵՐԵՎԱՆ, 8 ՕԳՈՍՏՈՍԻ, ՆՈՅՅԱՆ ՏԱՊԱՆ: Հայաստանի կանանց մինչեւ
19 տարեկանների ազգային հավաքականը, որը Եվրոպայի 2005/06թթ.-ի
առաջնության որակավորման առաջին փուլում Իտալիայի, Ավստրիայի եւ
Իսրայելի հավաքականների հետ ընդգրկված է 2-րդ խմբում, սեպտեմբերի
26-ից հոկտեմբերի 2-ը Իսրայելում կմասնակցի որակավորման առաջին
փուլի հանդիպումներին: Հանդիպումները տեղի կունենան Ռամատգան
քաղաքում` սեպտեմբերի 27-ին, 29-ին եւ հոկտեմբերի 1-ին:
Ինչպես «ՆՈՅՅԱՆ ՏԱՊԱՆ»-ին հայտնեցին Հայաստանի ֆուտբոլի
ֆեդերացիայի Մամուլի քարտուղարությունից, հոկտեմբերին Եվրոպայի
առաջնության որակավորման առաջին փուլի հանդիպումներին կմասնակցի
նաեւ Հայաստանի մինչեւ 17 տարեկանների ազգային հավաքականը: Այն
Ռուսաստանի, Ադրբեջանի եւ Իսրայելի հավաքականների հետ ընդգրկված է
4-րդ խմբում: Հայ ֆուտբոլիստների հանդիպումները նույնպես տեղի
կունենան Ռամատգանում` հոկտեմբերի 24-ին, 26-ին եւ 28-ին: