ՀԱՅԱՍՏԱՆԸ ՍՈՑԻԱԼԱԿԱՆ ԱՊԱՀՈՎՈՒԹՅԱՆ ՈԼՈՐՏՈՒՄ
ՀԱՄԱԳՈՐԾԱԿՑՈՒԹՅԱՆ ՄԱՍԻՆ ՀԱՄԱՁԱՅՆԱԳՐԵՐ ԿԿՆՔԻ ՆԻԴԵՌԼԱՆԴՆԵՐԻ,
ԲՈՒԼՂԱՐԻԱՅԻ ԵՎ ՎՐԱՍՏԱՆԻ ՀԵՏ
19-12-2005 19:15:00 | Հայաստան | Հասարակություն
ԵՐԵՎԱՆ, 19 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Նախատեսվում է, որ
Հայաստանը սոցիալական ապահովության ոլորտում համագործակցության
վերաբերյալ համաձայնագրեր կկնքի Նիդեռլանդների, Բուլղարիայի եւ
Վրաստանի հետ: Այս մասին դեկտեմբերի 17-ին հայտնեց ՀՀ աշխատանքի եւ
սոցիալական հարցերի Կենսաթոշակային ապահովության վարչության պետ
Արտեմ Ասատրյանը: Նրա խոսքերով, արդեն իսկ համաձայնեցման փուլում
են Բուլղարիայի եւ Վրաստանի հետ կնքվելիք փաստաթղթերը:
Ա.Ասատրյանի տեղեկացմամբ, մասնավորապես, Ռուսաստանը եւ
Ուկրաինան բարձրացրել են սոցիալական ապահովության ոլորտում ԱՊՀ
միջպետական համաձայնագրի մեջ (1992թ.) փոփոխություններ կատարելու
հարցը: Վարչության պետը նշեց, թե նախաձեռնությունը վերաբերում է
նրան, որ ԱՊՀ մի երկրի սոցապահովագրության համակարգ վճարներ
կատարած օտարերկրյա քաղաքացին կարողանա կենսաթոշակ ստանալ իր
քաղաքացիության երկրում` վճարներն ստացած երկրի համակարգից: Ըստ
համաձայնագրի, ԱՊՀ երկրներից յուրաքանչյուրը պարտավոր է կենսաթոշակ
նշանակել ԱՊՀ մյուս երկրի` իր տարածքում մշտապես բնակվող
քաղաքացուն: