2006 Թ.-ԻՆ ՀԱՅԱՍՏԱՆ ԵՆ ՆԵՐԿՐՎԵԼ 6284 ՆՈՐ ԵՎ 16,6 ՀԱԶԱՐ
ՕԳՏԱԳՈՐԾՎԱԾ ՄԱՐԴԱՏԱՐ ԱՎՏՈՄԵՔԵՆԱՆԵՐ
12-12-2007 19:00:00 | Հայաստան | Տնտեսություն
ԵՐԵՎԱՆ, 12 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Անցած տարի ռուսական
արտադրության մարդատար նոր մեքենաների շուկայում գործունեություն
իրականացրած 7 իրավաբանական եւ 3 ֆիզիկական անձանց կողմից Հայաստան
է ներկրվել 4491 մեքենա: ՀՀ Մաքսային պետական կոմիտեի տվյալներով,
ըստ իրացման ծավալների ապրանքային շուկայում ամենամեծ բաժինն ունի
«Արմենիա Լադա»-ն` 80,18%, որին հաջորդում է «Կարկոմավտո»-ն`
19,05%: Ուսումնասիրությունները ցույց են տվել, որ 2006թ.-ին
նախորդ տարվա համեմատ բարձրացել են ռուսաստանյան արտադրության
«ՎԱԶ» եւ «ԳԱԶ» մակնիշի մեքենաների որոշ տեսակների իրացման գները:
Այլ երկրներից անցած տարի 30 իրավաբանական եւ 48 ֆիզիկական
անձանց կողմից Հայաստան են ներկրվել 1793 նոր մարդատար
ավտոմեքենաներ: Ընդ որում, 1263-ը` ներկրվել են իրավաբանական, իսկ
530-ը` ֆիզիկական անձանց կողմից:
Բացի այդ, անցած տարի Հայաստան են ներկրվել շահագործման մեջ
եղած 1,1 հազար ռուսական եւ 15,5 հազար ոչ ռուսական արտադրության
մարդատար ավտոմեքենաներ:
Նշենք, որ Հայաստան ավտոմեքենաներ ներկրող տնտեսվարող
սուբյեկտներից 14-ը հանդիսանում են օտարերկրյա ընկերությունների
պաշտոնական ներկայացուցիչներ: