ՀԱՅ ՀՐԱՏԱՐԱԿԻՉՆԵՐԸ ԿՄԱՍՆԱԿՑԵՆ ՖՐԱՆԿՖՈՒՐՏՈՒՄ ԵՎ ՍՏԱՄԲՈՒԼՈՒՄ
ԿԱՅԱՆԱԼԻՔ ԳՐՔԻ ՏՈՆԱՎԱՃԱՌ-ՑՈՒՑԱՀԱՆԴԵՍՆԵՐԻՆ
03-10-2007 18:05:00 | Հայաստան | Հասարակութիւն
ԵՐԵՎԱՆ, 3 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: ՀՀ Մշակոյթի
նախարարութեան Հրատարակչական գործի գործակալութեան եւ Հայաստանի
Հրատարակիչների ազգային ասոցիացիայի (ՀԱԱ) նախաձեռնութեամբ
հայաստանեան մի շարք հրատարակչութիւններ կմասնակցեն հոկտեմբերի
10-14-ին Ֆրանկֆուրտում անցկացուելիք Գրքի 59-րդ միջազգային
տոնավաճառ-ցուցահանդեսին: Ինչպէս «ՆՈՅԵԱՆ ՏԱՊԱՆ»-ի թղթակցին
յայտնեց ՀԱԱ-ի նախագահ Վահան Խաչատրեանը, ցուցահանդէսում առանձին
տաղավարով «Անտարես», «Զանգակ», «Կոլաժ», «Նահապետ» եւ այլ
հրատարակչութիւններ կներկայացնեն գրական-գեղարուեստական,
գիտահանրամատչելի, մանկապատանեկան եւ ուսումնական մօտ 200 անուն
տպագիր արտադրանք: Դրանց մի մասը կազմելու են Հայոց
ցեղասպանությանը նուիրուած աշխատութիւնները:
Ըստ Վ.Խաչատրեանի, նախատեսւում է, որ ցուցահանդէսի ընթացքում
հայ հրատարակիչները պայմանագրեր կկնքեն տարբեր երկրների
հրատարակիչների, գրավաճառ ֆիրմաների եւ տպագրատների հետ:
ՀԱԱ-ի նախագահը նշեց, որ հայ հրատարակիչները կմասնակցեն նաեւ
հոկտեմբերի 27-ից նոյեմբերի 10-ը Ստամբուլում կայանալիք գրքի
ցուցահանդեսին: